TULO ka mga purok karon sa Barangay 23-C, Isla Verde, Quezon Boulevard sa Davao City ang dunay daghang mga gisuspetsahang kaso sa coronavirus disease (Covid-19).
Nagpagula dayon og pamahayag ang lokal nga kagamhanan sa Davao City nga kung mamahimo molikay sa Barangay 23-C gumikan dunay tulo ka mga purok niini ang dunay mga gisuspetsahang kaso sa Covid-19, hinungdan nga gipatuman gilayon ang lockdown sa maong barangay.
"Around 56 individuals were also evacuated and brought to a PUI center for quarantine. Everyone is hereby advised to avoid Barangay 23-C," tipik sa pamahayag sa lokal nga gobyerno ning dakbayan.
Bisan ang amahan sa barangay nga si Kapitan Alimoden "Wating" Usman miangkon nga dunay positibo nga kaso sa maong mga purok ug gihangyo niya ang katawhan nga magtinabangay aron mapukan ang virus.
"Kanang Purok 3 ug Purok 4, mao nay identified dunay positive. Ang Purok 7 PUI lang to siya. Medyo stress gyud ko karong panahona kay halos wala na gyo'y pahulay, mao na i-apil nalang mi ninyo sa pag-ampo nga masulbad ning problema sa among barangay," tipik sa pamahayag ni Usman nga nahinabi sa dxGM Super Radyo Davao.
Gawas sa Barangay 23-C, nahibaloan sab kini mismo kang Mayor Sara Duterte-Carpio nga daghan sab ang kaso sa Buhangin District, butang nga dugang nakapa-amping sa katawhan.
Kini nga hitabo daw mora'g dalan nga di lang taman Abril 26, 2020 ang Enhanced Community Quarantine (ECQ) kay lagmit morekomenda ang mga doktor ngadto sa lokal nga kagamhanan nga kinahanglan mo-extend ang mga adlaw sa pag-quarantine sa katawhan.
Kung sa mangga pa wala pa kaayo mihinog ang bunga, sa karon mao pa'y paghinog sa Covid-19 sa Dakbayan sa Davao, butang nga kinahanglan mag-amping ang katawhan ug mosunod sa mga lakang nga gipatuman sa gobyerno.
Hapit na usa ka gatus ang mga nag-positibo sa Davao City, busa kinahanglan gayod mag-amping ang katawhan ug dili mag-ginahi og ulo, diin ang pinaka-importante, ang dili paggawas sa balay kung dili man lang gikinahanglan.