SUPERBALITA CEBU

Niñal: Monggo Drive: monggos balig baynte

Eskina

UNSAY mapalit sa imong baynte? Duha ka munchkins? Usa ka Cornetto? Pwede. O pwede pud 1/4 kilo nga monggos nga makabusog na og usa ka pamilya sa usa ka adlaw. Ang monggos sabaw na, sud-an pa. Healthy pa gyod.

“Please support our Monggo Drive para sa mga naglisod sa among pinanggang lungsod sa Pinamungajan ning panahon sa krisis. We are closely coordinating with our town’s local government unit ini nga project, labi na sa distribution, so makasalig mo nga maabot sa angayng tabangan ang inyong hinabang. Di man pud pwedeng akoy mokaon ining monggos kay motukar akong gout ining pagkaona.

“Mga duha ka semana na pud ning atong campaign, ug salamat sa nakatabang na ug sa padung pang motabang. Ang pagtinabangay rong panahona is the new rakenrol. Matsalams.”

Mao ni akong gi-post sa Facebook sa miaging semana, ug ako ning giusab og sibya dinhi aron mas daghan pang mahibawo. Basin pa diay og naa pay matandog nga kasingkasing.

Pinamungajan tungod kay taga diri ko, taga dinhi akong mga ginikanan, dinhi ko natawo ug dinhi ko nakamatngon og buot. Ug labaw sa tanan, dinhi ko ron natanggong ining quarantine uban akong pamilya. Aksidente ning akong pagtabang sa among tagilungsod.

Wa koy planong mogawas sa balay hangtod mahuman ning krisis. Para nako, human na ang volunteerism phase sa akong kinabuhi. Akong pamilya na ang prayoridad karon. Apan usa ka adlaw mi-chat akong igsoon nga naa sa US ug miingon nga magpadala siyag gamayng hinabang alang sa mga naglisod sa among lungsod, labi na ang mga daily wage earners nga nakulban sa kaldero ining bayrus.

Ako na lang kunoy mamalit sa mga goods ug mamutos ini. Mi-coordinate dayon ko sa among mayor, Glenn Baricuatro, alang sa distribusyon, kay mas nasayod man ang munisipyo kon kinsay angayng tabangan sa lungsod. Namalit kog sinako nga bugas ug ako ning gi-repack uban ang mga higala nako nga volunteers. Apan maikog man sab ta mohatag og bugas ra, apilan gyod natog de-lata. Apilan na lang pud natog monggos para sabaw.

Ug kay nakuwangan man ang gipadala sa akong igsoon, natukod namo ning Monggo Drive. Ug puyra buyag, aduna sab intawoy naluoy. Kapin 200 ka pamilya na ang atong natabangan gikan sa tulo ka bukirang barangay sa Pinamungajan - ang mga barangay sa Camugao, Lamac ug Anislag.

Daghan pang barangay ang atong sudlon kay wa mi planong mangundang. Sa gustong motabang, palihug lang og tawag/text ini nga number alang sa detalye: 0998-9981265. Salamat.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph