UGMA gyud unta, Abril 25, 2020, ang katapusang dakong bola sa A Million Thanks raffle promo sa Gaisano Main, Country Mall, Balamban, Bogo ug Moalboal.
Ang batan-ong artistang si Patrick Quiroz unta ang bisita ni Ms. Rosemarie Gaisano aron molingaw sa mga mamalitay ug maoy mobunot sa tiket nga modaug og bag-ong awto.
Unya may Enhanced Community Quarantine pa man, giuswag ang bola sa wa pay tino nga petsa. Ipahibalo ra kon kanus-a ang bola.
•••
Nakatan-aw ko sa My Husband’s Lover sa una sa GMA 7 pero, sama sa ubang mga teleserye, putolputol ang pagsubay nako niini tungod kay may daghang mga lakaw.
Ning pag-replay niini, usa sa akong gikahinaman mao ang paglugwa ni Chanda Romero isip inahan ni Eric nga gidala ni Dennis Trillo. Gawas nga maayong artista si Chanda, ganahan usab ko sa iyang tingog.
Di kini hait o langgis. Nindot sa dunggan, sa pandungog. Projects pa more alang niining banggiitang Cebuana.
•••
Sa mga replay sa It’s Showtime, usa sa mga nakatandog ug naka-inspire nako mao ang performance ni Carlmalone Montecido nga may deperensya sa panan-aw sa unang grand finals sa Tawag ng Tanghalan diin si Noven Belleza ang nidaug.
Wa modaug si Carlmalone pero iyang napakita nga bisan sa iyang kahimtang, mahimo pa gihapong makab-ot ang pangandoy nga makita ug madungog sa madlang pipol nga mokanta ug gani nakatigi sa uban pang maayong mga mag-aawit.
•••
Gikinahanglan gyud ang pagbantay sa mga ginikanan sa ilang mga anak labina kon mga bag-ong gadgets na ang hisgutan. Dunay mga sulod sa social media nga di maayo og impluwensya sa mga bata.
Ning bag-o lang, usa ka TikTok video diin ang kunohay bida, nga bata ang tingog, grabe kaayong nakapamalikas. Pila ra ka segundos ang akong nagugol. Wa ko kaagwanta. Giluod ko nga naglagot.
Bisan tuod makaingon ta nga outlet kadto sa iyang kalagot pero pwede ra man god unta tong isinggit niya sa lugar nga way tawo nga makadungog.
Gusto lang ba kaha siyang mosikat kay nag-trending ang iyang video? Sayop nga pamaagi kon akoy pasulti-on.