ANG Dabawenyo Fide master (FM) Austin Jacob Literatus milangkat na sab og laing titulo human mikampeyon sa 2nd Atty. Jong Guevarra Mindanao Online Blitz Grand Prix sa nakalabay nga weekend.
Ang Toril-based nga si Literatus, nga National University varsity woodpusher sa University Athletic Association of the Philippines (UAAP), milampurnas og 145 puntos human ang tulo ka liga sa chessfest nga giisponsoran ni Atty. Jong Guevarra, nga bag-uhay rang nagsaulog sa iyang adlawng natawhan ug giorganisa ni Ely Acas.
Gipildi niya ang laing Dabawenyo Harison Maamo sa Matina ug kanhi De La Salle University (DLSU) varsity player Jayson Salubre nga nabutang sa ikaduha ug ikatulo nga pwesto.
Si Maamo mitala og 134 puntos, samtang si Salubre mikamada og 116 sa torneyo nga eksklusibo sa Mindanao players, gihimo via lichess.org.
Ang top three nga mananaug midawat og cash prize nga P1,200, P800 ug P500.
Suma sa magduduwa, “kabisado na nako mga tira sa kalaban og kabisado napud nako ang time control (bullet) sa dula.
Giangkon sab hinuon niya nga lisud nga kaatbang si Salubre.
“Solid iyang mga depensa ug sige napud mi dula."
Sa third leg, si Literatus mikamada og 56 puntos sa 21 ka duwa samtang si Salubre miiskor og 46 ug Maamo mihimo og 42 puntos.
Apil sa top five sila Aglipay Oberio (33 points) sa Island Garden City of Samal ug arena grand master (AGM) Henry Roger Lopez (31) sa Panabo City.
Si Literatus miangkon sab sa National Master Prospero Cruz Memorial Blitz Arena ug Happy Easter Chess Arena nationwide online chess tournament titles.