GIPAHIBAWO ni Mayor Sara Duterte-Carpio kagahapon, Biyernes, Abril 24, nga ang gitinguhang pagpatuman sa modified community quarantine (MCQ) unta sa Lunes, Abril 27, di mahinayon, inay mosunod sa rekomendasyon sa Inter-Agency Task Force for Emergency Infectious Diseases (IATF-EID) nga lugwayan ang enhanced community quarantine (ECQ) hangtud sa Mayo 15.

Tungod niini, giklaro ni Duterte-Carpio nga tanang guidelines nga gipatuman sa siyudad sa Davao magpadayon hangtud sa maong adlaw gumikan kay ilawom pa gihapon kita sa ECQ.

Sumala sa mayor nga ang kalampusan sa ECQ dili pa masulti ning panahona gumikan kay mag-agad kini sa pagsunod sa katawhan. Gisulti niya nga kon magsige gihapon ang katawhan og gawas, magsige gihapon og katag ang kagaw sa coronavirus disease (Covid-19).

Sumala pa nga dako kaayo og papel ang katawhan aron nga malibkas na ang ECQ nga gipatuman karon.

Samtang gitataw sa mayor nga ang Davao City nagpatuman og 16 ka mga dalan ug balay nga ilawom sa lockdown sugod kagahapon, Abril 24.

Tungod niini, dunay 16 ka mga tim ang ipakatag aron nga magmonitor sa maong mga lugar.

Wa hinuoy gibutyag pa nga mga dalan o lugar sa pagsuwat ning balita.

Sayo niini, giaprobahan ni Presidente Rodrigo Duterte niadtong Huwebes, Abril 23, ang rekomendasyon nga lugwayan ang ECQ hangtud sa Mayo 15 sa National Capital Region, apil na ang laing 23 ka probinsiya ug duha ka siyudad nga nailhang "high risk areas" sa Covid-19.

Samtang gisulti ni Presidential Spokesperson Harry Roque nga mga lugar nga magpabilin ubos sa ECQ, ug ang ipailawom sa re-evaluation sa Mayo 16, mao ang: NCR o Metro Manila, Benguet, Pangasinan, Bataan, Bulacan, Nueva Ecija, Pampanga, Tarlac, Zambales, Batangas, Laguna, Cavite, Rizal, Oriental Mindoro, Occidental Mindoro, Albay, Catanduanes, Antique, Iloilo, Aklan, Capiz, Cebu, Cebu City, Davao del Norte, Davao de Oro, ug Davao City.

Ang ipailawom og kausaban human ang Abril 30 mao ang mga probinsiya sa Benguet, Pangasinan, Tarlac ug Zambales.

Gitin-aw sab ni Roque nga ang Inter-Agency Task Force (IATF) for the Management of Emerging Infectious Diseases subling magsusi sa kahimtang sa Antique, Iloilo, Aklan, Capiz, Cebu, Cebu City, Davao City, Davao de Oro ug Davao del Norte. (Uban ang taho gikan SunStar Philippines)