BUOT ni Gobernador Gwendolyn Garcia nga pangandaman ang panglawas ug ekonomiya sa lalawigan sa Sugbo sa di pa modesisyon ang kadagkoan sa pag libkas na sa enhanced community quarantine (ECQ) sa probinsya sa Sugbo ug ubang lugar.
Mas gusto niya nga negusyo sa agrikultura ang tutokan karon nga maoy iyang nakita nga kuwang ang Sugbo human gipatuman ang ECQ tungod sa hulga sa coronavirus disease (Covid-19).
Kini ang asoy ni Garcia sa press conference sa Kapitolyo sa Abril 24, 2020, human nibisita ug nakigtagbo kaniya ang mga magpapatigayon sa Sugbo nga nanghangyong di na dugayon ang pagpatuman sa ECQ.
Gilugwayan ni Presidente Rodrigo Roa Duterte ang pagpaubos sa 24 ka mga lalawigan ug duha ka dakbayan lukop nasud sa ECQ hangtod sa Mayo 15, 2020 tungod sa grabeng hulga sa Covid-19.
Nalakip sa lista ang dakbayan ug Probinsya sa Sugbo ubos sa ECQ.
Si Garcia nagkanayon nga iyang pangandaman ang giisip niya nga bag-o nga normal tungod sa Covid.
"Because the IATF has announced nga atong ECQ for Cebu and Cebu City will be extended to May 15. I'm fine with that. But gikan karon hangtod sa Mayo 15, dili lang ko magnilingkod ug maghuwat nga moabot ang adlaw sa Mayo 15. Mangandam na ta,” matod ni Garcia.
Sa Biyernes, Abril 24, nakigtagbo si Garcia sa mga magpapatigayon sa nagkalainlaing chambers of commerce sa Sugbo.
Kini gumikan sa ilang hangyo pagpa-abli og balik na sa mga negusyo taliwa sa hulga sa Covid.
Apan tubag ni Garcia kanila mao ang pagsagop sa bag-o nga sitwasyon.
"But more importantly, ug mao kani ang challenge nga akong gi-presentar sa Cebu Chamber of Commerce, Mandaue Chamber of Commerce, Filipino Chinese Chamber of Commerce ug ang Philippine Millers Association. Niingon ko, work with us as the province of Cebu, transitions from ECQ or enhanced community quarantine to ECD. Unsa man ning ECD? Enhanced countryside development,” matod ni Garcia.
Alang kaniya, di na normal ang kinabuhi ug panginabuhi sa mga Sugboanon panahon nga libkason na ang ECQ.
Usa sa lakang ni Garcia mao ang paghatag og igong pagtagad sa panglawas ug kapasidad sa mga Sugboanon nga makigbatok sa kagaw sa Covid.
Mass testing
Sa maong plano, nahilakip niini ang pagpahigayon og targeted mass testing pinaagi sa paggamit sa mga rapid test kits.
"Busa mag sugod ang atong targeted mass testing, kay aron masayod ta, kon unsa man gyud ang kahimtang sa atong mga lungsod kabahin niining Covid-19. Atong sutaon pilay porsyento sa katawhan nga magrepresentar sa tibuok population nga dunay antibodies,” matod ni Garcia.
Ikaduha mao ang pagpahimutang sa ekonomiya sa Sugbo aron masiguro nga dali nga makabangon ang lalawigan sa nasinati nga krisis.
Unsaon man kini?
Matod ni Garcia nga mas dali ang pagbangon sa Sugbo kon mahibawo kini unsaon pagdawat sa kamatuoran nga nausab na ang kaniadtong paagi sa pagpakabuhi ug panginabuhi. Ug ang pagsagop sa kasamtangan nga sitwasyon.
Agrikultura
Alang sa gobernador, way igong ikasarang ang Sugbo sa natad sa pagkaon.
Hinungdan nga buot niya nga mobalik sa pagpananom ug dunay agriculture business aron mahimong igo ang panginahanglan sa mga Sugboanon.
"As we have seen and what this experience is teaching us, Cebu is not self-sufficient. Nagkinahanglan ta og bugas, nagkabuang ta og pangita ron...Adto pa ta mangita sa Mindanao o kaha maghuwat pa ta sa atong shipment, very dependent ngadtos Manila,” matod ni Garcia.
Hagit ni Garcia sa mga magpapatigayon ingon man sa mga Sugboanon nga mananom, aron may panginabuhi, may anihon, may supply ug may kwarta.
"Let us go now from building condominiums to agribusiness, to producing food for the Cebuanos. Let's be self sufficient. Daghan kaayog yuta sa atong kalungsoran nga mahimong matamnan,” matod ni Garcia.
Pahinumdom ni Garcia nga di angay ikaluya ang gimando nga extension sa ECQ. Alang niya, kinahanglan nga huptan ang paglaum, magtinabangay ug maningkamot ang mga Sugboanon alang sa mas malambuon nga Sugbo. (ANV)