GI-ISOLATE na karon ang mga membro sa pamilya sa nagpositibo sa coronavirus disease (Covid-19) sa Pinikitan, Barangay Camaman-an ning siyudad sa Cagayan de Oro.
Kini ang gikumpirmar ni Dr. Adriano Suba-an, ang regional director sa DOH-Northern Mindanao nga gibutang kining mga membro sa pamilya sa usa ka lugar ug gihimo na ang mga lakang nga angay buhaton.
"Yong close contact ng pasyente gibalhin na sila sa usa ka lugar for isolation and also the other person who are actually nga na exposed including health workers we already informed regarding the situation and they were actually isolated and given the right information what to do," matud ni Suba-an.
Kahinumduman nga si Patient (PH)6783 usa ka 69-anyos, ang nagpositibo kinsa nakasinati og sintomas sama sa ubo, hilanat, pagpanakit sa tutonlan ug kalisod sa pag-ginhawa niadtong Abril 10, 2020 ug naadmit niadtong Abril 15.
Namaty kini niadtong Abril 18 apan nigawas ang resulta niadtong Abril 23.
Si Cagayan de Oro Mayor Oscar Moreno niingon nga adunay subsob nga contact tracing sa pasyente. Gisuta ug lakip ang travel history sa maong namatay.
Gipaubos na usab niini ang area sa Pinikitan sa Camaman-an sa estriktong pagbantay ug giawhag ang residente sa lugar nga magpuyo sa balay.
"Mao na ang akong hangyo diha dapit sa Camaman-an nga puyo lang sa balay," matud ni Moreno.