HUGOT nga gibantayan karon sa Department of Health (DOH) ang mga nagpositibo sa coronavirus disease (Covid-19) tungod kay dako ang posibilidad sa local transmission dinhi sa Northern Mindanao.
Gibutyag ni Dr. Adriano Suba-an ang regional director sa DOH-Northern Mindanao ug chairman sa Regional Task Force for Covid-19 nga nagabantay sila karong panahona ug ila na kining gipreparahan.
Dili buot niini nga mahitabo ang nahitabo sa usa ka kaso nga natala didto sa Caraga Region kung diin ang 10-anyos nga bata nga anak sa usa ka lalaki nga gikan nagtambong sa derby sa Matina Davao City ang nagpositibo sa coronavirus.
"We are closely monitoring sa mga positive karon. There will always be a possibility nga magkaroon tayo ng local transmission. In fact it is not a remote possibility, we have to prepared for that," matud ni Dr. Suba-an.
Gani kadtong kaso sa Valencia City, Bukidnon kung diin usa ka kapitan ang nagikan gihapon sa Matina Davao City ang aduna gyod special treatment nga gihimo sa Task Force sama sa nagpadala og team didto gikan sa emergency operation center aron himoun ang mga butang aron nga dili mokaylap.
"Eventually we are going to prepare on that and make sure nga di mokalit og kalat ug dita ma-overwhelmed and we can manage the contact tracing," matud ni Suba-an.
Gibutyag sab niini nga sukad nag- lockdown ang Manila mga usa na ka bulan ang nilabay, mamatikdan nga nagpabiling ubos ang kaso sa nagpositibo sa rehiyon ug gipaniguro niini nga mamintinar kini.