DAGHAN karon ang nasubo ug nibati nga sila anaa sa tumang diskriminasyon, sama nalang pananglit kung mabaniog nga dunay nag-positibo sa coronavirus disease (Covid-19) sa usa ka purok sa barangay. Madamay ang tanang mga residente.
Kini ang kasagmuyo nga gibati sa mga residente sa Barangay 23-C, Poblacion Davao City human nga mipagula og pamahayag ang lokal nga kagamhanan ning dakbayan nga likayan ang Barangay 23-C gumikan dunay daghang gipangdala sa PUI center.
Mikatag dayon ang diskriminasyon sa social media ug bisan sa pagpamalengke, di na sila pasudlon sa palengke ug sa usa ka supermarket sa usa ka dakong mall, kung makasulod man, mahulagway ang kabalaka sa tawo nga kaatubang niini.
Daghan na sab nga mga barangay ning dakbayan ang mipailawom og lockdown gumikan sa mga kaso sa Covid-19, apan dili tanan sa barangay, duna lamang mga purok. Ang nahitabo, madamay ang tanang residente. Mahimong kahadlukan sa publiko.
Gipasabot sab ni Barangay 23-C Kapitan Alimoden Wating Usman nga dili tanan nga purok sa Barangay 23-C ang gi-lockdown, naa lamang tulo, ug nangayo og hangyo ang kapitan nga dili unta mabutang sa diskriminasyon ang tuyok sa kinabuhi sa iyang mga residente luyo niining krisis.
Sama sab sa pagpasabot sa ubang mga barangay kapitan, dili mosugot si Kapitan Usman nga dunay bisan usa sa iyang mga residente ang makasinati og diskriminasyon, labi na sa pagpamalengke.
Ang punto ni Usman, dili mayatakan ang katungod sa iyang mga residente ug naa kanunay ang tumang kagawasan isip usa ka lungsuranon, uban sa pagtuman sa mga gipasunod sa gobyernong lokal batok Covid-19.
Tawo kita, mobati og kasagmuyo ug kahiubos, sahi ra ug ang midiskriminar karon ang anaa sa lugar, sakit sab baya nga mabati, di ba?
Busa, inay anaa ang diskriminasyon, unta wagtangon kini, magtinabangay sa pagbatok sa Covid-19 aron mabalik na sa normal ang tanan sa labing dali nga panahon.