NAPAKYAS ang dakong kalipay nga gibati sa igsuon tang mga Dabawenyo sa dihang gisumpayan sa atong nasudnong gobyerno ang enhanced community quarantine (ECQ) sulod sa 20 ka adlaw hangtud sa Mayo 15, 2020.
Nag-desisyon na unta si Mayor Sara Duterte-Carpio nga sugod ugmang adlawa mag-modified community quarantine (MCQ) na ang Davao nga gikalipay sa atong mga kaigsuonang Dabawenyo kay pipila kanila makabalik na sa trabaho ug ang mga drayber nga bulan na ang milabay nga walay kita sa ilang pagmaneho para ibuhi sa ilang pamilya, mahibalik na sab unta.
Pero naudlot ang tanan tungod niining pandemic nga sakit, diin sa Davao, moabot na sa 16 ang namatay, ug ang nakapait niini kung sa umaabot nga Mayo 15 dili pa mukonhod ang biktima ni Covid-19, laing ekstensyon na sab ang buhaton sa atong gobyerno.
Ang ako lang gikatingad-an, kung nganong wala man matuman ang gusto ni Mayor Sara, nga aduna ma’y gahom ang lokal nga gobyerno nga dili i-apil sa nasyunal nga hukom kung sa iyang pagtuo wala na’y peligro sa iyang lokal nga gobyerno labot Covid-19.
Sama sa ubang mga probinsya sa Davao del Sur, Davao Occidental ug Davao Oriental wala kini gi-apil tungod kay gibase kini sa adlaw-adlaw nga rekord sa mga panghitabo sa iyang probinsiya o siyudad kung mikunhod na ba ang biktima sa Covid-19 pinaagi sa rekomendasyon sa lokal nga gobyerno human makigtagbo sa mga ekspertong mga doktor labot niini.
Mao man gani nga gusto tang mag federal ta aron mawala nang sentralisado nga sistema sa atong gobyerno, gi-anunsyo naman unta to sa atong lokal nga gobyerno sa Davao nga mag-MCQ kita nga magsugod unta karong adlawa, Abril 27.
Maayo lang kung ugaling hatagan pa nato og lugway, pero ang akong namatikdan dili makaya sa atong lokal nga gobyerno suportahan ang kunsumo sa atong mga kaigsuonan, kay kung mahatagan nila og bugas nga lima ka kilos ug lima ka tinapa, mukapin man sad sa tulo ka semana wala pa’y segunda nga ihatag? Pilay paghurot sa lima ka kilo kung lima o unum ka tawo ang sakop sa pamilya nga nakadawat.
Magsalig man gyud kita sa tabang sa atong gobyerno, tungod kay gobyerno man ang nagpatuman nga dili sila makatrabaho ug makamaneho tungod niining atong sitwasyon karon, hinuon sakto ang atong kagamhanan kay ang ilang paghigpit alang man kini sa atong tanan, apan, ang rasyon atong namatikdan nga basta kay nahatagan kana, okay na, pero inigkahurot wala na’y segunda, naa pero dugay, ug labi na karong panahona nga gisakyan og pamolitika sa ubang politiko, pwersa sa maayo.
Si Inter-Agency Task Force spokesperson Cabinet Secretary Karlo Nograles, nag-ingon nga P4,000 paubos nga nagdawat og pension pwedeng makadawat og Social Amelioration Program (SAP) pero ang patakaran sa Department of Social Welfare and Development (DSWD) dili pwede? Asa ma’y tinuod ini? Pasabta daw ninyo ang mga tawo.
Hinaut nga masubay sa lokal nga gobyerno kining tanan, kay basin kung naglikay ta nga dili mamatay sa Covid-19, apan mamatay ta sa kagutom. Maghiusa ta ning atong giatubang nga dakong problema karon.