DAGHAN nang mga istorya sa wakwak nga nadungog sa palibot nga naggikan sa nagkalahi-lahi nga lugar sa nasud. Apan ang nahitabo niadtong Sabado sa gabii, Abril 25, didto sa kabalayan duol sa baybayon sa Barangay Matina Aplaya, Talomo District Davao City, lahi sa mga nadunggang istorya tungod kay nadokumento kini pinaagi sa video og na post pa kini sa social media platform nga Facebook.
Sa usa ka video post ni Xaneng Uror nga lumulopyo sa maong dapit, kinsa maoy usa sa naka dokumento sa panghitabo, makita ang mga residente sa maong lugar nga nagdala og mga flashlight ug mga bunal samtang ginapangita ang giingong wakwak nga mitugpa sa atop sa pipila ka mga balay sa maong lugar.
Nakuha sab sa maong video ang pipila ka mga tawo nga giingong nakakita mismo sa maong wakwak nga duna kunoy isog kaayo nga nawong.
Tungod sa nahitabong pagpangatake sa giingong wakwak, gikuha sa Superbalita ang komento sa mga netizens partikular sa Facebook group page nga Davao City Cluster War.
Sa pagpangutana, daghan ang migawas nga wala mituo sa maong panghitabo tungod kay wala nakita sa mga netizens diha sa video ang giingong wakwak.
Duna pa gyo'y miingon nga netizen nga lagmit namaklad lamang kadto sa maong dapit ug nagtago-tago tungod kay nasakpan ug nahadlok nga mapusposan sa mga residente.
Duna say miingon nga mitago gyod kadto nga tawo gumikan kay misupak sa ECQ guidelines, mitago tungod kay nahadlok nga madakpan sa otoridad.
Daghan sab nga mga netizens ang wala kaangay sa pagresponde sa mga tawo sa maong dapit tungod kay nawala ang physical distancing gumikan nagtapok na ang mga tawo gawas sa ilang mga panimalay.
Ubay-ubay sab ang nagtuo nga kung di man to tawo nga namaklad ug nagtago sa awtoridad, lagmit iring lamang ang naglagubo sa atop atol sa paggukod sa mga tawo, kay kung wakwak suma pa, molupad kuno gumikan naa kini pako subay sa mga pelikula sa telebisyon.
Sa pinakaulahing pagpanubay sa Superbalita sa pipila ka mga residente pinaagi sa messenger ilang gibutyag nga walay wakwak nga nasikop sa mga tawo nga miresponde niadtong gabhiona.