ANG National Basketball Association (NBA) mihatag og pagtugot sa pipila ka magduduwa nga makabalik og training sa ilang team facilities sugod niadtong Sabado, Abril 25 (oras sa Pilipinas).
Hinuon mapatuman lang kini sa mga lugar diin walay stay-home nga kamanduan ang ilang local government units nga usa sa mga pamaagi aron masumpo ang pagkuyanap sa coronavirus disease (Covid-1).
Matod sa usa ka kasaligang tinubdan, dili gustong magpaila gumikan kay wala pa'y opisyal nga pag-anunsyo ang NBA kabahin niini, limitado lang kini sa individual sessions.
Alang lang sab kini sa mga magduduwa nga mobulontaryo sa pag-training.
Dili tugtan ang team management sa paghan-ay og training alang sa ilang mga magduduwa.
Giklaro sa tinubdan nga kining maong lakang wala nagpasabot nga segurado na ang pagbalik sa aksyon sa liga.
Nagkanayon si Commissioner Adam Silver nga sa sunod buwan pa mobuhi og pinal nga desisyon ang liga kon unsay angayan buhaton niini.
Gisuspenso og sugod sa NBA ang ilang mga duwa niadtong Marso 11, 2020 human nasuta nga positibo sa Covid-19 ang pambatong sentro sa Utah Jazz nga si Rudy Gobert.