NIABOT na'g sobra usa ka bulan ang kurentinas nga gitawag kaniadto og community quarantine hangtod nga nisaka kini og enhanced community quarantine (ECQ). Karong bag-o lang nahiapil ang Davao region nga ipadayon ang ECQ tungod sa daghang kaso sa natakdan sa coronavirus disease o Covid-19.
Ang ubang probinsya ug syudad sa Pilipinas gibutang na lang sa general community quarantine (GCQ) ug pwede na silang manggawas og hinay-hinay nga mobalik ang pag-abli ang mga tindahan ug modagan ang sakyanan.
Hinuon magpabilin gihapon ang pagsul-ob og face mask, magmintinar og distansya ug kanunay manghunaw sa kamot. Daghan nang nangaluya, gipangsapot, nasuko, gimingaw ug gigutom tungod kay walay trabaho.
Ang gipanghatag sa gobyerno kung niabot man, di gayod maka-igo sa panginahanglan sa kinabuhi bisan sa pagkaon lang. Niabot ba sa inyo ang hinabang sama sa Social Amelioration Program nga gipaagi sa DSWD? Ang suporta sa OWWA ug Dole sa mga trabahante nga nawad-ag trabaho? Ang tabang gikan sa DA sa mga mag-uuma ug mananagat, kumusta na?
Kung wala pa, hulat-hulat ug taasi pa ang pasyensya. Hasta si Presidente Rody nagsakit pud sa ulo kung unsaon nga makalingkawas kita sa dakong trahedya karon. Ang gi-ampo niya karon sa iyang Ginoo (kay naa man daw siya'y laing Ginoo) mao ang pagkaplag og bakuna batuk sa Covid-19.
Busa niadtong niaging semana nihanyag siya'g premyo nga P10 milyon ug gipatas-an pa kini niya ngadto sa P50 milyon sa tawo o grupo nga unang maka-imbento sa bakuna. Daghang mga nasud nga nangita sab og kaugalingong tambal. Ang nasud sa Madagascar naglusad na'g tambal nga herbal alang sa Covid-19.
Gikan kini sa usa ka tanom nga gigamit kaniadto sa pagtambal sa sakit nga malaria. Karong hapit na ang pag-abri sa ilang klase didto, gimando sa ilang presidente nga pabakunahan o motumar ang mga bata sa maong tambal aron dili matakdan sa Covid.
Naa pud sa Mexico nga gigamit nila ang 500mg nga tabletas nga aspirin nga isagol sa init nga tubig nga may limonsito ug dugos sa putyukan. Imnon kini kausa hangtod kaduha matag adlaw og tanggal kuno ang virus.
Daghan sab dinhi sa atoa sama sa gihimo karon sa University of the Philippines, sa Philippine General Hospital ang ilang plasma therapy, ug uban pa. Anaa pud ang Fabunan Anti-Viral Injection sa Zambales nilang Dr. Willy Fabunan sa Don Marcelino, Zambales.
Anaa na kini US Patent niadtong 2001 nga epektibong itambal sa sakit nga dengue, pneumonia, HIV, Aids, pinaakan sa bitin, ug uban pa. Malaumon si PRRD ug ang katawhang Pilipino nga sa dili madugay makaangkon na'g bakuna ang pagsangka sa Covid-19.
Gawas niini, niapil ang Pilipinas sa gihimo sa World Health Organization nga "solidarity program" nga mag-testing sa pipila ka mga karaang tambal nga posibleng makaayo sa Covid-19. Kasagaran niini mga tambal kanhi sa malaria sama sa gihimo sa Madagascar, tambal nga antibiotic, sakit sa baga, ug uban pa.
Apan maghulat pa ta'g pipila ka bulan una makahimo og bakuna kay kinahanglan kining moagi og makuti nga pagtuon sa Food and Drug Administration. Dali-dali tawon mo.