MOARANGKADA na sa ikatulong hugna ang pagpang-apod og mga relief goods sa 182 ka mga barangay sa Davao City karong mga mosunod nga mga adlaw. Ang mahatagan kadto lamang naggunit og mga ration cards nga gikan sa barangay.
Giingon ni Davao City Mayor Sara Duterte-Carpio nga tulo ka hugna ang giandam sa lokal nga kagamhanan ning siyudad subay sa pagpatuman sa enhanced community quarantine (ECQ) labi na karon nga nahatagan kini og lugway padung Mayo 15, 2020.
Una niini, ang mayor nagbutyag nga dunay paigo nga salapi ang lokal nga kagamhanan ning siyudad alang sa pagkaon sa katawhan luyo ning ECQ aron mabatukan gayod ang coronavirus disease (Covid-19).
"Naa tay gitagana nga tulo ka hugna niini pasa sa ECQ, pero karon, pangitaon sa nato ang giingon nga mga residente nga wala kadawat og rasyon," sumala ni Mayor Sara atol sa regular nga interbyu niini sa 87.5 FM, Davao City Disaster Radio.
Nagpasalig si Mayor Inday, busa dili angay maguol ang mga residente ning 182 ka mga barangay sa Davao. Ang guol lamang karon kay lagmit madugay paghatud sa mga relief goods sa ubang barangay, kay pangitaon pa ang mga wala nahatagan. Dili buot ang mayor nga naay bisan usa nga wala kadawat, gusto niya nga nakadawat tanan.
Kadtong wala nakakuha og ration card, dunay pamaagi ang LGU-Davao niini, pinaagi sa Davao City Agri, nahatagan og tibuok manok (dressed chicken) ug mga gulay ang mga wala naapil sa ration cards, naalibyohan kadyot ang kakuwang sa pagkaon sa pamilya.
Unta daghan na ang mang-repack aron dali nalang mapadala sa mga molupyo sa Davao City ang mga relief goods. Naa untay mga tawo gikan sa matag barangay ang motabang sa pag-repack aron mapadali ang tanan, hinaut unta.