GIIMBESTIGAHAN karon sa City Health Office ang kamatayon sa lima ka mga Covid-19 suspects kon patients under investigation (PUIs) dinhi sa siyudad sa Cagayan de Oro sulod lamang sa duha ka adlaw gikan niadtong April 24 ngadto April 26.
Gibutyag ni Cagayan de Oro City epidemiologist Dr. Joselito Retuya nga gisuta karon sa ilang buhatan ang mga dugang pang impormasyon kalabot sa mga pasyente lakip ang ilang mga nahinagbo.
Ang unang kaso mao ang 65 anyos nga babae nga taga RER phase II, Barangay Kauswagan nga namatay niadtong Sabado, April 25 ug gikonsiderang Covid-19 suspect. Namatay kini tungod sa acute respiratory failure. Gi-admit pa kini sa pribadong balay tambalanan ug gi-refer ngadto sa Northern Mindanao Medical Center (NMMC) kon diin didto kin nabugtoan.
Ikaduha mao ang kamatayon sa 62 anyos nga taga JR Borja Extension, Barangay Camaman-an tungod sa acute respiratory failure secondary to chronic obstructive pulmonary disease.
Gi-classified sab kini isip Covid-19 suspect ug namatay niadtong Sabado, Abril 25. Ang patayng lawas niini gilubong sa Bolonsori cemetery ug gipaagi na sa insakto nga proseso sa paglubong. Nakuhaan na usab kini og swab test ug gipaabot ang resulta.
Ang iyang mga close contact ang gimandoan na nga magpaubos og 14 ka adlaw nga kwarantinas.
Adunay tulo nga wala na classified nga Covid-19 suspects apan ilang kamatayon giimbestigahan og lakip.
Kini mao ang 82 anyos nga babae nga taga RER phase II, Kauswagan ug Tamparan, Lanao del Sur. Namatay kini sulod sa iyang puloy-anan tungod sa ug ang diagnosis sa doktor nga miatiman niini mao ang acute myocardial infarction essential to hypertension ug ginaisyuhan og transport permit iyang patayng lawas gidala sa Tamparan, Lanao del Sur.
Ang ikaupat mao kining 25 anyos nga mabdos sa Zone 3, Pinikitan, Barangay Camaman-an nga namatay niadtong Domingo April 26 sa iyang puloy-anan tungod sa asthma. Kini wala na makuhaan og swab test.
Ang City Health Office niingon nga wala kini siyay prenatal visits atol sa pagmabdos nga gitouhang anaa na sa upat ngadto lima ka bulan.
Giklaro sab ni Retuya nga kini siya layo lang ang panimalay niadtong taga Pinikitan Camaman-an nga nagpositibo sa Covid-19, wala mibyahe sa laing lugar. Giingong daan na usab kini siya grabe ka asthmatic ug nalubong kini mga alas 11 sa buntag adlawng Dominggo diha sa Bolonsori Cemetery.
Ang ikalima mao kining 67-anyos nga lalaki nga gikan sa Taif, Lumba-Bayabao, Lanao del Sur nga namatay niadtong April 25 tungod sa cardiogenic shock, pulmonary edema, acute myocardial infarction.
Na-admit kini sa pribadong balay tambalanan ug nakabsan sa kinabuhi pagkapon, ang patayng lawas niini ang gihatagan og transport permit aron madala sa Lanao del Sur.
Gipaabot pa usab ang resulta kung kini sila positibo ba sa coronavirus disease o Covid-19.
Samtang si Cagayan de Oro City Mayor Oscar Moreno nangayo og pagsabot sa katawhan sa wala deretso pagpahibalo niini niadtong adlawng Sabado ug Dominggo apan matud niini nga ilang gihimo ang mga lakang nga maprotektahan ang katawhan sa siyudad.