GIDUSO karon ni Senador Bong Go ang programang “Balik-Probinsiya” diin nagtinguha sa pagpalambo sa probinsiya alang sa ekonomikandong kalihukan.
Tumong niini aron maapod-apod ang patigayon sa ngilit nga bahin sa nasod ug dili lang magpunsisok sa dagkong dakbayan.
Nasuta man gud niining paggawas sa Covid-19 sagad sa mga tawo nga natakboyan sa maong sakit nanimuyo sa siyudad.
Dili man pud ikalalis nga naghuot na gyud ang mga tawo ug patigayon sa siyudad, labi na sa Metro Manila. Tungod usab kini sa tinguha sa uban nga molambo ilang panginabuhi.
Gisuportahan sa ubang ahensiya sa gobiyerno ang lakang ni Senador Go. Gani ang Department of Trade and Industry mitanyag man og insentibo alang niadtong mga magpapatigayon nga moabli sa ilang negosyo diha sa probinsiya.
Aron mapalig-on kining tinguha ni Senador Go, mas maayo tingali makipag-coordinate siya sa mga opisyal sa dagkong mga siyudad sa nasod.
Ang local government unit man gud maoy dunay dakong control kon magpasulod ba sila og dugang patigayon sa ilang siyudad o limitahan nila.
Sa panahon karon, siyempre ang mga LGU maningkamot gyud nga makatigum og dugang kita gikan sa mga buhis, busa dili sila magpanuko og dawat kon dunay mga bag-ong negosyo nga ablihan sa ilang dapit.
Kon duna lang gyud igong patigayon sa mga lungsod, munisipyo ug sa probinsiya, seguarado nga gamay nalang ang mangandoy nga motrabaho sa dagkong mga siyudad.
Naa sa iyang insaktong lakang ang DTI paghatag og insentibo sa mga magpapatigayon nga moablli og negosyo sa probinsiya.
Kining program nga “Balik-Probinsya” angay gyud suportahan kay nakita nato karon ang epekto sa pagdagsang aning sakit nga Covid-19. Daghang mga patigayon sa siyudad nagsira sa ilang operasiyon ug daghang mga trabahanti ang nawad-an sa ilang trabaho ug wala sab makapauli sa ilang tagsa-tagsa ka probinsiya.
Tingali panahon na nga limitahan na gyud ang dugang patigayon sa mga dagkong siyudad. Dasegon sa gobiyerno ang mga businessmen pag-abli sa ilang negosyo sa mga probinsiya.
Apan, una sa tanan paningkamot gyud sa gobiyerno nga sangkapan nila ang mga probinsiya sa batakang panginahanglan sama sa insaktong suplay sa tubig, kuryenti, ug maanindot nga karsada, ug labaw sa tanan kahapsay ug kalinaw sa palibot.