PADAYON nga gilusad sa kapolisan ang operation sikop batok sa duha ka suspetsado nga niluthang patay sa duha ka mga sundalo ug laing duha ka sibilyan niadtong nilabayng adlaw sa Valenzuela Road, Agora ning siyudad sa Cagayan de Oro.

Si Senior Police Officer 1 Francisco Granada sakop sa City Intelligence Detection Unit (CIDU) nibutyag sa Sun.Star Superbalita nga aduna na silay nakuhang impormasyon sa miluthang patay sa upat ka mga biktima apan dili pa ikabutyag ning panahona.

Subo lamang kaayo human ang American national nga si Michael Turner, taga Sta. Cecelia Subdivision, ning siyudad nidumili sa paghatag og impormasyon kalabot sa duha ka suspetsado.

Kahinumduman nga si Turner ang usa sa kauban sa duha ka mga suspetsado apan milakaw lang dayon human nakainom lang og duha ka botelya nga beer ug wala na nasayod sa hitabo sa C & N Videokebar.

Patay sila Corporal Roque Adolfo Tagalongan, minyo, lumad nga taga Brgy. Poblacion, lungsod sa Kibawe, Bukidnon ug Sgt. Michael Mochiniso Sino, taga Laguitas, siyudad sa Malaybalay Bukidnon. Ang maong mga sundalo pulos sakop sa 4th infantry Division, sa Camp Evangelista ning siyudad.

Apil ang sibilyan nga mao si Leo Acedo, 32, minyo, taga Sea Wall, San Juan, Lapasan ning siyudad ug kritikal ang kondisyon sa higala niining si Jun Jun Sabala, taga Villa Verbe, Balulang ning siyudad.

Matud ni Granada nga basi sa pamahayag ni Turner dihang ilang gihinabi gibutyag niini nga dili niini kaila ang duha ka mga suspek ug naila lamang dihang adunay transaksyon kalabot sa negosyo. Gani nidala pa kini og abogado nga mao si Atty Jose Pallugna atol sa gihimong paghinabi sa kapolisan.

Giingong gitawag ang mga suspetsado sa pangalan lamang nga Mario ug Jun.

Apan si City Police Director Benedicto Lopez nagbahad atol sa interbyu sa usa ka sibyahan sa radyo nga kung dili magkooperar si Turner kanila posibleng apil kini nga ilang pasakaan og kaso.

"We will file a charges against him," matud ni Lopez. (SVB)