UPAT ka mga tawo ang nangaangol human naligid ang sakyanan niadtong Miyerkules mga alas 11:20 sa gabii sa lungsod sa Salay, Misamis Oriental.

Nabali ang bukton nila ni Mary Bangon, 65, minyo; Ansari Maisog, 29, minyo; Abdulla Sobra, 31, minyo samtang bun-og sa lain-laing parte sa lawas ang naangkon ni Bainkon Macaraob, 23, ulitawo, pulos lumad nga taga siyudad sa Marawi.

Nasayran nga gikan pa ang mga biktima sa siyudad sa Butuan ug pauli na sa siyudad sa Marawi sakay sa pribadong sakyanan nga crosswind dihang paghidangat sa likoun nga bahin sa Salay nawad-an og balanse ang driver.

Tungod kay wala mabantayan sa mga biktima sa kalit nga aksidente wala nakapanghawid hinungdan nga naipit ang ilang mga bukton ug maayong pagkabali.

Niini, gipangdala ang mga biktima sa Northern Mindanao Medical Center (NMMC) ning siyudad sa Cagayan de Oro, samtang nagpabiling gikostudya sa kapolisan sa Salay Police Station ang sakyanan alang sa imbestigasyon.

Daw wala sab gibasol sa mga biktima ang driver nga si Abdulla tungod kay aksidente lamang ang hitabo.

Luwas man sa makuyawng kahimtang ang mga biktima ning panahona apan padayon gihapon nga giatiman sa mga doktor sulod sa balay tambalanan.