NAGBANSIWAG sa social media nga Facebook labi na sa taga Davao City ang istorya sa giingong "wakwak" nga mitugpa sa atop sa kabalayan daplin sa baybayon sa Barangay Matina Aplaya, Talomo District, Davao City niadtong Abril 25, 2020.
Sa usa ka video post ni Xaneng Uror nga lumulopyo sa maong dapit, kinsa maoy usa sa naka dokumento sa panghitabo, makita ang mga residente sa maong lugar nga nagdala og mga flashlight ug mga bunal samtang ginapangita ang giingong wakwak nga mitugpa sa atop sa pipila ka mga balay sa maong lugar.
Nakuha sab sa maong video ang pipila ka mga tawo nga giingong nakakita mismo sa maong wakwak nga duna kunoy isog kaayo nga nawong. Tungod sa nahitabong pagpangatake sa giingong wakwak, gikuha sa Superbalita ang komento sa mga netizens partikular sa Facebook group page nga Davao City Cluster War.
Sa pagpangutana, daghan ang migawas nga wala mituo sa maong panghitabo tungod kay wala nakita sa mga netizens diha sa video ang giingong wakwak. Duna pa gyo'y miingon nga netizen nga lagmit namaklad lamang kadto sa maong dapit ug nagtago-tago tungod kay nasakpan ug nahadlok nga mapusposan sa mga residente.
Naa sab miingon nga walay wakwak, sa telebisyon ra makita ang imahe sa wakwak. Diha sab miingon nga usa lamang kadto ka iring, midagan nga naglagubo sa atop kay gigukod sa mga residente kinsa wala na mipatuman sa social distancing. Sa mga miresponde, walay wakwak nga ilang nadakpan.
Bisan walay wakwak nga nakita ug nadakpan, magpabilin gihapon kini nga kalingawan nga mosangko sa kahadlok sa hunahuna sa mga Pinoy. Nahimo na kining kabahin sa kulturang Pilipino ang pagtuo nga naay wakwak gikan pa sa katiguwangan.
Di gyud diay matuis ug di mawala ang kustumbre ug kinaadman sa mga Pilipino bisan pa luyo sa modernong teknolohiya karong panahona.