SIKAT karong semanaha ang terminong "deportation." Kini labot sa duha ka mga dagko nga insidente nga gikalambigitan sa usa overseas Filipino worker (OFW) didto sa Taiwan ug foreigner dinhi sa Pilipinas.
Sila gipistahan karon sa social media tungod sa ilang managlahi nga gihimo. Unang gisumsoman sa katawhan ang gihimo sa Filipina caregiver sa Taiwan nga buot sa Department of Labor and Employment (DOLE) nga ipa-deport tungod sa cyber libel.
Sa suwat pahayag sa DOLE niadtong Sabado, Abril 25, ang ahensya nag-akusa sa caregiver sa Yunlin County nga nakalapas sa balaod. Kini tungod sa giingon nilang "wilful posting of nasty and malevolent materials against President Duterte on Facebook intended to cause hatred amidst the global health crisis brought about by the Covid-19 pandemic."
Tungod sa gihimo sa caregiver, ang Philippine Overseas Labor Office sa Taiwan nakig-alayon dayon sa broker ug employer niini alang sa iyang deportasyon. Hinuon, ilang gipakigkitaan ang caregiver didto sa iyang gitrabahoan aron pasabton sa iyang gihimo nga pwede siyang ikiha sa Taiwan ug sa Pilipinas.
Usa sa ilang mga gisabotan sa caregiver mao nga wad-on na iyang gipaskin nga materyal nga nagdaut sa Pangulo ug magpaskin usab siya og video nga magpadayag sa iyang pagpangayo og pasaylo.
Apan nahibulong ang mga opisyal tungod kay duna na say mga gipaskin sa Facebook page ni POLO Taichung nga nagsuporta sa maong OFW, butang nga ilang gisusi ug nasuta nga ang OFW dunay grupo nga nagdaut sa Pangulo.
Sa laing hitabo, usa ka langyaw ang buot ipa-deport tungod sa iyang pagsukol sa mga otoridad nga nagpahimangno sa iyang partner labot sa gipatuman nga enhanced community quarantine.
Ang gihimo sa duha ka mga bida ning semanaha, angay gayud nga silotan subay sa balaod tungod kay nakayatak sa katungod sa ubang mga tawo sama sa Pangulo ug pobreng tinugyanan sa balaod.
Apan, di lang nako masabtan ang kinaiya sa mga tawo karon kay grabe kaayo nga maka pakpak kung ang Pangulo maoy makasaway ug makapanghimaraut og ultimong tawo, apan kung ang gobyerno na gani ang sawayon mobuwelta dayon.
Labaw na ko nga wa makasabot sa DOLE kay mas okupado pa sila pagpa-deport sa Pinay, kaysa pag-atiman sa mga kabus nga mamumuo nga wa naayudahan sa ilang ahensya.