GIPAHIBALO sa Department of Interior and Local Government (DILG) - Northern Mindanao nga wala pay natala nga kaso sa coronavirus disease (Covid-19) sa rehiyon.
Gibutyag ni regional director Arnel Agabe nga ang Bureau of Jail Management Penology (BJMP) adunay mokabat 24 ka jail facility sa tibouk rehiyon ug bisan usa sa maong prisuhan walay natala nga suspects o probable nga classification sa Covid-19 patient.
Ang 24 ka jail facility nagbaton ug kinatibuk-an nga 4,456 ka mga inmates karon panahona ug wala kanila ang nakitaan og mga sintomas.
“Walay usa sa suspect, probable sa Covid-19 case nga recorded sa atong BJMP,” matud ni Agabe atol sa niaging virtual presscon sa Regional Task Force for Covid-19.
Kadtong mga incoming nga mga priso nga nadakpan ang ilain una ug kinahanglan adunay medical certificate gikan sa ilang gigikanan nga lungsod o siyudad.
Gibahin na usab ang mga jail guard aron malimitahan ang lihok sa sulod ug gawas sa prisuhan.
Sulod sa mga prisuhan gipatuman ang mga health protocols sama sa saktong paghugas sa kamot, social distancing, paglimpyo ug uban pa.
Niadtong bulan sa Marso, usa ang Misamis Oriental Provincial Jail sa milusad sa e-dalaw o komunikasyon sa mga priso pinaagi sa video chat ngadto sa ilang mga minahal sa kinabuhi nga anaa sa gawas samtang gidili usa ang pagbisita kanila.
Giaghat ang tanan jail facility labina kadtong adunay mga wifi conection nga maoy himoung paagi aron ma communicate sa mga piniriso ang ilang hinigugma pinaagi usa sa internet.