DAGHAN ang nangita ni Kim Jong Un sa North Korea sanglit taudtaod na nga wa siya makita sa mga nanglabay nga mga importanteng panghitabo sa maong nasod.
Matod pa, na-coma siya. Matod sab sa uban, namatay na kuno.
Sa pagkakaron, lisod mahibaw-an ang tinuod nga panghitabo sanglit tak-om ang baba sa mga nangulo sa maong nasod.
Gani, milabay na lang ang duha ka adlaw usa pa nahibaw-an ang kamatayon ni Kim Jong Il, amahan ni Kim Jong Un.
Ingon ana kahugot ang tak-om sa ilang baba kon ang kinabuhi na sa lider sa North Korea ang hisgotan.
•••
Ingon usab niini ang nahitabo sa Bohol.
Daghan ang nangita ni Vice Governor ug kanhi Kongresista Rene Relampagos.
Asa na man siya nga taudtaod na man siya nga wala na igkita sa kapitolyo, mao kini ang kasagaran nga pangutana karon.
Nakita nako siya niadto pang Pebrero 21, 2020 sa dihang mibisita si Agriculture Secretary William Dar sa Bohol og si Relampagos ang mibarog nga Acting Governor sanglit gibutang man sa preventive suspension si Gov Art Yap.
Human niadto, nawala na sab siya og si BM Dionisio Victor Balite ang mibarog isip Acting Vice Governor hangtod karon.
•••
Walay klarong tubag ang pangutana.
Adunay nagsulti nga tua si Relampagos sa usa ka ospital sa Taguig, nagpatambal.
Apan dili masuta kon tinuod ba kini kay huhungihong lang kini og mismo ang nagsulti wala sab makakita kay igo lang sab kini niya nga nadunggan sa ubang tawo.
Adunay nagsulti nga tua sa Amerika, nagpatambal.
Apan sama sa unang estorya, tsismis lang kini og walay kamatuoran nga tinuod gyod kini.
•••
Angay unta ang Department of Interior and Local Government (DILG) ang moklaro niini.
Unsa man gayod ang leave nga gi-file ni Vice Governor Rene Relampagos, sick leave, vacation leave?
Asa man siya karon, nia ra sa Pilipinas o gawas sa Pilipinas?
Hangtod kanus-a man ang iyang gipangayo nga leave?
Mao kini ang mga pangutana nga hangtod karon, nagpangita pa sa tubag.
•••
Ang Bohol nagpabilin nga Covid-free.
Husto ug tukma kaayo ang gibuhat ni Governor Art Yap nga sirad-an ang mga pultahan ug mga bintana sa Bohol kaniadtong Marso 16.
Wala gyod makasulod ang virus maoy hinungdan nga wala pay gikabalita nga namatay o natakdan sa Covid-16 sa Bohol hangtod karong mga adlawa.
Kon padayonon ang gihimo nga pagtak-op sa mga pultahan ug mga bintana sa Bohol, hayan magpadayon ang pagka-Covid-free sa Bohol.
Apan dunay dakong problema.
Adunay plano ang Inter-Agency Task Force on the Management of Emerging Infectious Diseases (IATF-EID) nga pasudlon sa Bohol ang mga 262 ka mga na-stranded nga Boholano OFWs nga gikan sa lainlaing lugar sa Manila.
Ang nakaparat kay gi-desisyonan kini nga wala mahibalo o pananghiri si Governor Art Yap.
Igo na lang siya gipahibalo sa iyang sakop nga gipahibalo ra sab sa Maritime Industry Authority (Marina) nga dunay tulo ka mga biyahe sa 2GO gikan sa Manila paingon sa Bohol nga magkarga sa maong 262 ka mga pasahero.
•••
Hilabihan kadako sa problema. Matod pa sa sulat ni Yap, ang Bohol adunay 25 lang ka ventilators, 33 ka hospital beds alang sa Covid-16 patients, walay paigo nga mga quarantine o isolation center sa mga lungsod hasta sa siyudad sa Tagbilaran.
Buot ipasabot, dili andam ang Bohol nga mosagobang kon pananglit adunay usa o duha nga nagdala sa Covid-16 sa maong 262 ka mga pasahero.
Mihangyo si Yap nga unta makigsabot kaniya ang IATF sa dili pa mo-desisyon sa maong mga pasahero.
Apan dili ba ulahi na ang tanan sanglit matod pa sa balita, nakalarga na ang barko ug padung na kini sa Tagbilaran?
Unsay kaseguroan nga ang 262 ka mga pasahero negatibo sa Covid-16?