GIATNGAN ug gidabdaban sa mga miyembro sa New People's Army (NPA) ang 2 ka mga sakyanan sa mga lokal opisyal nga magpulong-pulong unta sa probinsiya sa Cotabato.

Sigun sa taho gikan sa Cotabato Police Provincial Office, nga banda alas 3:00 sa hapon, Marso 24, sakay ang mga lokal nga kandidato sa Magpet uban si Vice-Mayor Florentino Villasor paingon sa usa ka pulong-pulong.

Apan pag-abot nila sa sitio Lakwakon, barangay Basak, giharang sila sa gibana-banaang 20 ka mga sakop sa NPA nga gipangulohan ni Kumander Ponyong sa Front Committee 53 Guerilla unit.

Matud ni Villasor, silang tanan, gipakanaug sa mga rebelde gikan sa ilang gisakyan ug gikuha ang ilang mga cellphones, 2-way radio ug mga camera unya gisunog ang usa ka pick-up nga Hilux ug laing usa nga Isuzu Trooper nga gipanag-iyahan sa munisipyo sa Magpet.

Gidugang ni Villasor sila gibaharan ni Kumander Ponyong nga kung mobalik pa sila sa maong dapit nga dili mobayad og campaign fee, madisgrasya gayud sila.

Pipila ka oras ang milabay, gibuhian sa mga armadong kumunista ang mga kauban ni Vice-Mayor Florentino nga dali-dali nga mibalik sa munisipyo sa Magpet.

Gilusad na sa militar ug kapulisan ang manhunt operation batok sa mga rebelde. (Edgardo Fuerzas)