MOKABAT sa P300,000 ang danyos sa pagkasunog sa usa ka tindahan sa bugas sa lungsod sa Minglanilla mga alas 6:40 sa Martes sa gabii, Abril 28, 2020.
Si Fire Inspector Cecil Alicaya, municipal fire marshal, niingon nga mga alas 6:40 sa gabii ilang nadawat ang alarma ug gisaka sa second alarm mga alas 7:12 sa gabii kay paspas mikatap ang kayo.
Ang tindang mantika sa establisemento ang gituohang nakapadali sa pagkatap sa kayo.
"Gawas sa bugasan, maora man gud na og mini grocery store kay naa man pud mga baligya nga mga groceries. Unya ang oil usa to sa nakapakusog sa kayo," dugang ni Alicaya.
Sa imbestigasyon, nagsugod ang kayo sa ikaduhang andana sa edipisyo nga gipanag-iya sa usa ka Quilope Abella, apan wa pa mahibaw-i unsay sinugdanan sa kayo.
Naangin usab sa sunog ang usa ka botika. (BBT)