SUPERBALITA DAVAO

Delos Reyes: FM pass ug uban pa

Yanong Pagsabot

MAAYONG adlaw sa tanan! Murag gikapoy na ang kadaghanan sa sige og puyo sa balay. Gamay'ng agwanta nalang aron mahuman kay daghan na gyod ang naglisod sa hut-ong sa mga kabus. Dili kaayo nato makita ang kalisud sa uban tungod naa raman ta nagkulong sa atong mga balay, apan daghan na ang nagtiyabaw sa kalisud nga nasinati, labi ang dunay gagmay nga mga bata.

Unsaon nga ang mga pobre, imbis apiki sa pang-kwarta, mao pa hinuon ang daghang gibuhi nga mga bata kay halos matag tuig manganak. Panahon sa kalisud hinaot nakatuon na mo og leksyon, ug ang mga naghunahuna nga mag minyo hunahunaon nga dunay responsibilidad nga atubangon.

Giusab na pud sa kagamhanan ang pagpatuman sa paggamit sa Food and Medicine (FM) pass, gikan sa first digit, karon last digit napud ang gibasihan kinsa ang dapat mo gawas aron mamalit sa mga panginahanglan sa balay.

Dili sayon ang bulohaton sa Mayor sa dakbayan sa Davao apan nagpasidaan na siya nga ang tanan pulos ekspermento o trial and error kon asa ug unsa ang mas maayo aron mapugngan ang paghuot sa katawhan panahon sa pagpamaliengke nga malikayan ang pagpasa-pasa sa virus kay dili man makit-an.

Daghan sab ang nagtiyabaw kay wala kuno giapil sa lista nga gipasa sa mga purok leader aron mahatagan og hinabang gikan sa gobyerno kay dunay mga paryente ni purok leader nga dili unta angayan apan maoy nakadawat kay sa mas labaw nga nanginahanglan.

Ang uban to-a pa sa lain nga mga purok apan giapil sa iyang listahan. "Blood is thicker than water" ba ni o kunsabo sa kurapsyon sa kwarta sa kagamhanan?

Sa laing bahin, atong ginayukboan ang mga nahimong bayani nga mga frontliners nga sa ilang pagtamud sa ilang gipanumpaan nga moserbisyo sa katawhan, ilang gituman bisan pa ang ilang kinabuhi ilang gitugyan.

Ang uban kanila to-a sa laing mga nasud ug ubang dapit nagserbisyo nga sa ilang paggikan, naghandom nga haw-ason sa kalisud ang ilang pamilya nga gibiyaan. Pipila kanila mipahulay na kay natakdan sa pasyente nga ilang giserbisyohan samtang ang uban kanila walay kasegurohan kon makapauli nga buhi o kaha i cremate nga dili na makita sa mga kabanay.

Sa atong kahimtang karon, dili lang unta ang atong kaugalingon ang atong segurohon apan ang kaayohan sa kadaghanan. Atong hinumdoman, puyo sa balay, tumanon ang mga mandu sa otoridad aron madali ang pagkahuman sa lockdown.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph