SUPERBALITA CEBU

Niñal: Ayuda sa biyuda

Eskina

MI-RING akong selpon gahapon sa buntag. Kinsa gud intawon ning nanawag alas says pang dako. Importante gyod tingali kay wa man naikog. Ako na lang gitubag.

“Sir, maluoy intawon ka,” miingon ang tingog sa pikas. Babaye. Medyo edaran na tingali si Manang base sa iyang tingog nga may dalang kurog. “Gilabyan ra intawon ko sa DS gahapon sir. Atong miaging adlaw gilabyan ra pud ko.”

“Taym sa manang, sa unsa ni?” nangutana ko. “DS diri Badian sir, labyan lang ko diri sa balay pirmi,” ingon siya, morag padung nang mohilak.

DS? Badian? Unsa ni iyang giyawyaw?

“Nang, kadiyot sa ha, hinay-hinay lang, ayawg hilak. Sa unsa gani ni?” nangutana na pud ko.

“Biyuda intawon ko sir, unya way pangita,” ingon siya. Nagkadaghan na ang detalye. Napun-an nag biyuda nga jobless. Samot na ko kalibog.

Duda nako sa DS, Duterte Supporters. Sakto, Duterte Supporters ni iyang pasabot. Naay mga DS sigeg agi-agi sa ilang balay sa Badian aron mang-recruit apan di siya tagdon kay tiguwang biyuda. Kini gyong mga DS lagi ba!

“Manang, pasagdi nang mga Duterte supporters kay kana sila...” — “Duterte sir?” — “DS, Duterte supporters...” — “Dili Duterte sir. DS sir, DSWD. Dili man ko nila hatagan og ayuda sir oy, bugas, sardinas, noodles. Biyuda baya ko ug...”

Ahmm, ok, uwaw gamay. “Pero wa koy matabang nimo aning butanga manang. Tig-repack ra ko, dayon ang taga munisipyo na ang moila kon kinsay angayng makadawat sa ayuda,” ingon ko. “Gawas pa manang, taga Pinamungajan ko, di ko taga Badian.”

“Tabangi intawon ko sir Ruphil. Ayuda sa biyuda lang unta ba,” ingon siya. Ingnon unta nako siya nga ganahan ko sa ryhming sa biyuda ug ayuda, apan unsa na man sab ning Ruphil?

“Manang, Insoy akong pangalan, dili Ruphil. Lorenzo “Insoy” Niñal, taga Pinam...”

“Ay. Di diay ka si Ruphil Bañoc?” ingon siya.

“Dili intawon manang oy. Pero manang, nice kaayo ang rhyming sa...”

“Sige sir, sorry sa istorbo.”

“Ok manang.”


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph