MAYO uno na. Labor Day. Unsaon man na karon nga kadaghanan wa may trabaho tungod sa Covid-19? Unsa kahay naa sa atong ugma samtang naa sa atong palibot ang corona virus?
Karon pa lang duna nay gipanday nga balaudnon ang mga kongresista (ug senador) bahin sa ‘New Normal’ kon malibkas na ang quarantine. Unsa kahay nagpaabot nato kon mag New Normal na ta?
Karon pa lang, may naobserbahan na nga daghan ang naglaag nga way mask. Posible usab nga way quarantine pass kining mga nanggawas sa ilang panimalay.
Unsaon man paglampos ang mga paningkamot nga mapugngan ang pagkatap sa virus kon di ta motahud sa mga otoridad? Basin nagtoo mo nga inig libkas sa quarantine, matsugi na usab ug mawagtang na ang virus.
Hello! Mao gani nga gianad-anad na ta anang New Normal kay di na parehas niadto ang atong paglihoklihok ug pagpuyo ning kalibutan.
Hinaut nga nagkasinabot ta.
•••
Nalingaw kong nagtan-aw sa mga artista nga nagpatubo sa ilang bungot, way tupi, way atiman sa mga hairdresser, nanggawas ang oban sa buhok, way make-up ug uban pa.
Mao kuno ni ang quarantine look. Duna sab hinooy uban nga bisan sa quarantine, naningkamot nga magpabiling glamoroso ug glamorosa ang hitsura.
Kanyakanyang gimik.
•••
Apil mo sa nakilig sa live video chat nila ni Bea Alonzo ug John Lloyd Cruz? Basin epekto lang usab kini sa quarantine ug sa kapuol nga sulod sa balay ra nagtuyoktuyok.
Daghan ang mga pelikula nga nagpares ang duha ug, syempre, daghan ang nagsunod sa ilang personal nga kinabuhi. Duna man gani tingali diha nga nangandoy nga unta silang duha na lang ang nag-uyab. Wa tingali gubot.
Hinoon, nagtuyok pa ang ligid sa kinabuhi. Kinsay nasayod kon sa kaulahian, silang duha ang magkadayon? Ganahan mo?
•••
Nalingaw ko sa baruganan karon ni House Speaker Allan Peter Cayetano bahin sa franchise sa ABS-CBN. Kon kaniadto morag balewala ra kini niya, karon nagkaragkarag (kuno!) siya nga mahatagan og bag-ong prankesa ang network?
Hala no? Mao nay giingon nga sa politika ug syobis, way permanenteng kaaway ug higala. Anà!