KALUOY sab ni Anne Curtis nga gipistahan intawn ang iyang hulagway diin natangtang ang tabon sa iyang dughan samtang nagsayaw didto sa Boracay atol sa taping nga gihimo alang sa pag-promote sa iyang bag-ong pelikulang Babe, I Love You sa programang ASAP XV.

Swerte (?) kadtong nakakuhag retrato sa maong hitabo kay makabaton silag souvenir o unsa. Pero kon imong i-apud-apod ug isabwag nga way pagtugot sa hingtungdan, lain na kanang istoryaha.

Click here for Election 2010 updates

May katungod si Anne nga mahimangod, masubo ug masuko. Lahi man gud kini sa mga hubo nga retrato nga nagkatag lang sa internet kay kasagaran ang mga hingtungdan ra man usab ang nagpakatap niini sa bisan unsang hinungdan ug katarungan.

Pero angay dawaton na lang ni Anne ug isipon nga dautang damgo. Unsaon? Basin diayg mao kini makahatag swerte sa ilang pelikula ni Sam Milby nga ipasundayag na sa Sabado Santo, Abr. 3.

Daghan na god kaayo ang naintriga sa pelikula tungod sa maong hitabo. Alegre sab ang mga eksena nga gipakita sa telebisyon.

***

Bendita sa Lukay na karong Dominggo nga mo-abli sa Semana Santa. Dunay uban molayat sa lagyong lugar aron adto didto mamalandong. Kaha? Ila sab na.

Bisag asa ta, basta kay atong tumanon ang unsay gikinahanglan ug angayng buhaton. Di kay magwarawara nga way hinungdan. O-ha!

Nakahukom na ko nga di moadto sa St. Therese Shrine sa Kalubian, Leyte karong tuiga. Higalang Rey Martinez ug Sir Joy Roble, sa sunod higayon na lang sab.

Adto ra ko sa Catmon. Palahi lang. Labi na kay niadtong Dominggo nakadiskubre ko nga may lugar didto (unsa gani tong baranggaya?) nga gitawag og Esoy’s Hot Springs nga gipanag-iya ni Kons. Celso Bustamante diin dunay init ug bugnaw nga tubig kon gusto kong magpapresko sa lawas. O-ha!

Lima ka kilometro lang hinoon ni siya gikan sa highway pero nindot ang karsada kay gipaaspalto ni Gob. Gwen Garcia.

Ang problema ani kon daghan ang parehas nakog gihunahuna ug magdasok na mi didto. Paet!

***

Unsa katinuod nga nagplano si PBB Double Up housemate Paul Jake Castillo nga dad-on ang iyang mga kauban ngadto sa ilang resthouse sa Catmon?

Kon mahitabo, magsilingan mi nilag duha ka adlaw? Di dautan.

***

Mga personal greetings. Belated happy birthday kang Ma’am Rosemarie Gaisano. Hinaut nga hatagan kag daghan pang katuigan.

Mga pahalipay ngadto kang Jessil Anngillou L. Serna nga mo-graduate isip valedictorian ugma sa – Blessed John XXIII Minor Seminary. Ig-unsa nako? Pag-umangkon! Garbo kaayo no? Haha! Kamo ba o! Ana lang!

***

Pagngon nato ang atong mga suga ug kagamitang dagitabnon ugma gikan sa alas 8:30 ngadto sa alas 9:30 s.g. ha? Pagduyog kini sa Earth Hour 2010.

Gamay ra kaayo ning tampo nato aron momenos ang kainit sa kalibutan tungod sa climate change. Ana ra god.