SA opisyal nga pakig-alayon ni Kusug mayoral candidate Alvin Garcia sa Partidong Nacionalista ni Senador Manny Villar, uban sa gihugonhugon nga pagtapon na usab sa mga kongresista sa probinsya nga gipanguluhan sa banayng Garcia, dali nga nakapasumangil si Cebu City Mayor Tomas Osmeña nga kining maong buhat sa paglayat sa pikas unya pagpabilin ni Gob. Gwen Garcia kintahay kang Gibo Teodoro usa ka klaro nga kaso sa “I love you how much?”
Kay niya pa sa ekslusibong pakighinabi sa Tulumanong Alagad sa DYRF Radyo Fuerza, 1215 KHZ AM kining maong buhat sa mga Garcia klarong pagseguro nga bisan asa pa nga gripo moagas ang grasya gikan sa mga presidentiable, maseguro gyud nga adto ra gihapon kini mo-embudo ngadto kanila.
Apan si kanhi Mayor Alvin Garcia nihimakak ning maong pasangil kay niya pa, bisan og wa pa magsugod ang campaign period daan namang sayud ang publiko nga ang iyang pagsuporta naa gyud sa Partidong Nacionalista ug ang iyang pagpaubos sa landong kang Villar tungod kay siya mituo sa kapasidad niini sa pagtabang sa kahimtang sa mga kabos nga mga Sugbuanon nga mahaw-as sa kalisdanan sa kinabuhi ug dili tungod kay siya nag-agap sa kwarta nga iyang madawat alang sa pagpangampanya.
Samtang wala pay kompirmasyon kon tinuod na ba gyud nga niuban kang Alvin Garcia ang mga kongresista sa probinsya nga naghimong buslot ug haw-ang sa suporta ni Gobernadora Gwen Garcia alang kang Gibo Teodoro kay unsa pa mang matanga sa suporta ang mamahimong ikahatag kon ang matag pundasyon sa matag kalungsuran ug distrito nangahurot na sa pagpanglayat.
Ang nakadaot lang sab ning atong kasamtangang “multi-party system” mao nga wala nay bili ang party loyalty ug ang bisan kinsang mga pulitiko ang mag-iyahay lang sa pagpalandong ug pagpanginlaba sa kun asa sila mabuhi sa ilang pamulitika.
Hinungdan nga kining “I love you how much syndrome” magpabiling tipik sa atong poltikanhong realidad sa Pilipinas hangtod walay tinud-anay nga reporma nga ikapatuman dinhi sa nasod.
Ang mas makasubo kay kining maong mentalidad dili lamang limitado sa duwa sa mga pulitiko apan mao usay nagpabiling dakong dangan sa tinud-anay nga pagpili og mga opisyal sa gobyerno nga takos ug sinserong mangatungdanan kay ang atong katawhan nga sobra na ang giantos nga kalisdanan. Samtang kugihan kaayo nga mobalikas sa mga pulitikong kurakot ug mobagulbol sa way hinungdang serbisyo.
Apan unyag abot sa eleksyon unya hayluon nas tagingting sa sapi o sa bisan unsang pabor baylo sa ilang boto sa balota. Pwera sa maayo, apan hangtod karong higayuna ang kinabag-ang duot sa atong mga botante ang pabiling mobaligya sa ilang kaugmaon lakip na sa henerasyon sa ilang mga anak sa usa lamang ka higayon nga kalipay. Kay ang kahakog sa sayon nga panapi ug kultura sa dinalian nga kalipay nga wa nay pagsakripisyo mao may maut nga kinaiya natong mga Pilipino nga hangtod karon nagsilbeng babag sa atong kalambuan.