INGON sa nagbahis ang mga menor nga mga sakop sa nagkadaiyang mga gang sa Metro Cebu.

Sa Lapu-lapu city lang, makapanglimbawot sa balhibo ang labing uwahi nilang nalambigitan nga krimen sa pagpatay sa usa ka lalake ug pagtinabanay sa pag-rape sa uyab niini.

Sa wa pa ni, duna nay mga pagpamusil nga sunodsunod nga nahitabo nga gikalambigitan gihapon sa mga menor.

Click here for Election 2010 updates

Sukad napasar ang Juvenile Justice and Welfare Act, ingon sa migara ang mga menor de edad kay di na man gud sila mapriso o sayon rang itanggong base sa mao nga balaod.

Kuti pa kaayo ang proseso nga agian una pa mabilanggo ang usa ka minor offender. Kinahanglan pang pamatud-an kon siya nakatugkad ug nakatimbang og maayo sa linugdangan sa iyang pagbuhat sa krimen.

Kon makalusot ang minor offender, mamahimo siyang gawasnon. Problema sa komunidad.

Mao bitaw nga bisan sa pagpatuman sa curfew sa mga barangay, mangatawa lang sila kay igo ra silang iuli ngadto sa ilang mga ginikanan.

Ang mga ginikanan nga mas busy sa pagpangitag ikapakaon sa ilang mga anak wa say panahon sa pagmaymay ug pagbadlong kanila.

Inay makatabang ang balaod, mipasamot na hinuon kini sa krimen nga sagad nalambigitan sa mga bata.

Gani, sa ilegal nga drugas, daghan sa mga menor ang gigamit nga tigdala sa “butang” kay kon maoy masakpan, di man sila mapriso.

Pila kaha ka mga amahan ang nagpahimus niini pinaagi sa paggamit sa ilang mga anak sa ilegal nga negusyo?

Dugay na ang mga reklamo sukad sa pagpatuman sa balaod. Panahon na kining i-review.