HUGOT nga seguridad ipatuman sa Philippine Coast Guard sa mga pantalan isip pagpangandam sa pagdagsa sa daghang mga pasaherong manguli sa ilang tagsatagsa ka mga probinsiya alang sa pag-obserbar sa Semana Santa.
Gitug-an ni Commander Anelito Gabisan sa Coast Guard District Central-Eastern Visayas (CGDCEV) nga nakahan-ay na ang ilang Oplan Semana Santa ug nakig-coordinate na sila sa mga local shipping companies, port authorities, Maritime Industry Authority, Maritime police ug sa Coast Guard Auxiliary alang sa pagpatuman og mas hugot nga seguridad sa mga pantalan ubos sa ilang jurisdiction.
Iyang gipahibawo nga sugod karong Lunes hangtod na sa Abril 8 ilang i-activate ang Public Assistance Center kun help desk sa tanang mga pantalan sa Central ug Eastern Visayas aron maoy moabag sa mga pasaherong magkinahanglan og assistance.
“The PAC will provide information, help, act on complaints and medical assistance on matters relative to sea travel for convenient, orderly, safe and secure embarkation of passengers and loading of cargoes,” nagkanayon si Gabisan.
Bukas usab ang hotline sa Coast Guard sa 416-6566 ug 0929-686-4123.
Isip kabahin sa pagpahugot sa seguridad, ang PCG mopakatap usab og dugang composite sea marshall nga maglangkob sa mga sakop sa Special Operations Group, K9 personnel ug special medical assistance response team ingon man mga blue guard nga idugang sa mga shipping companies.
Aron di mabalda ang ilang mga biyahe, giawhag ang mga pasahero nga motunga sa pantalan tulo ka oras sa di pa ang ilang biyahe ug likayan ang pagdala og mga kontrabando aron di malangay.
Matod ni Gabisan nga gawas sa pagbantay sa mga kontrabando, hugot usab nilang ipatuman ang Comelec gun ban maong alang samagdala og armas, kinahanglang mopakita sila og saktong dokumento apil na ang Comelec exemption permit.