GRUPO sa mga tinun-an magprotesta karong buntag atubangan sa rehiyonal nga buhatan sa Department of Education (DepEd) aron idemanda ang pagpahunong sa koleksyon sa graduation fee sa mga tunghaan.
Ang Kabataan Partylist nga nilusad sa ilang text hotline 09329776985 nga maoy kasumbongan sa mga ginikanan ug tinun-an batok sa mga tunghaang nangolekta og graduation fee ug Parents Teachers Community Association (PTCA) contribution nakadawat na og reklamo batok gibanabanang 50 ka mga tunghaan sa siyudad ug probinsiya sa Sugbo.
Gitinguha sa grupo nga mapatuman na gyud ang “zero-collection” sa mga tunghaan subay sa memorandum sa DepEd.
Si Renil Oliva sa Kabataan Partylist nagkanayon nga ilang idemanda kang DepEd Regional Director Recaredo Borgonia nga ipauli ang tanang nakolekta sa mga tunghaan gikan sa mga tinun-an ug imbestigahon ang mga tunghaang nilapas sa kamandoan sa ahensiya.
“Maghimo mig protesta aron idemanda ang pagpahunong na gyud sa koleksyon sa graduation fee ug PTCA ug ipaimbestigar ang tanang eskwelahan nga nisupak sa DepEd order,” nagkanayon si Oliva.
Si Borgonia nga nahinabi sa Sun.Star Superbalita pinaagi sa telepono nidasig sa grupo nga hatagan siya og kopya sa mga tunghaang gireklamo aron iya usab kining masusi sanglit di man sila mahimong molusad og imbestigasyon kon way reklamante.
“We welcome the report and we will act on this immediately. But they should submit to us their complaint para ma-check pud namo ug among maatiman,” pasalig usab ni Borgonia kinsa niingon nga hatagan hinuon og due process ang mga maestra.
Giklaro gyud ni Borgonia nga gidili gyud ang pagpangolekta alang sa graduation fee apan kon dunay gipatawag nga PTCA meeting ug nauyonan ang pag-amot, gitugot ra hinuon kini.
Apan matod ni Borgonia nga di mahimong compulsory ang graduation fee ug di usab kini himuong rekisitos sa pagpaso sa mga tinun-an.
Bisan pa sa pagdili, duna gihapoy mga tunghaan nga wa gyud maminaw sa pahimangno sa DepEd labina kay mga ginikanan nangahadlok.