HANGTUD ning panahona wala ta’y laing mahisgutan puro resulta sa coronavirus disease (Covid-19) adlaw-adlaw, nagpunay ta’g ihap kung pila na’y nangamatay sa tibuok kalibutan, pero matud pa’s mga katiguwangan nga nakaabot na og usa ka gatos katuig hangtud karong panahona, gamay ra daw ni kung ikompara sa Colera nga nahitabo sa ilang panahon.
Magamay man o dili, wa gyud ta’y gusto nga mahitabo ni sa ato karong panahona tungod kay daghan ang gipangligsan, nahunong ang mga social institutions, sama sa business sectors, transport sectors, government and private offices ug uban pa.
Tanan apektado gyud, ang atong nasudnong gobyerno nagkapoliki na intawon og unsaon nga matubag ang mga panginahanglan sa mga pobre nga katawhan kon unsay ilang makaon, apan ang pinakasakit lang, kay adunay pipila diha sa local government units (LGUs) nga nagpahimulos sa kahigayonan, kung diin, wala ug tuo ang mga reklamo kay gipang pili lang ang ilang gihatagan, mga paryente ug suod sa ilang pamilya.
Adunay uban moingon nga dili daw sila mamatay sa Covid-19 kun di mamatay daw sila sa kagutom, aw, kung mamatay ka’s kagutom wa gyud kay dungog kay sa tinuod lang, dili mamatay ang tawo kung dili makakaon sulod sa 40 ka adlaw apan, kon dili ka maka-inom og tubig sulod sa tulo ka adlaw kana segurado gayod nga mamatay ka.
Dunay daghang mga paagi nga mabuhi ta taliwala niining krisis nga atong karon, gani ang mga prutas ug mga utanon dako kana og ikatabang, temporaryo samtang ni-a pa kita niining Covid-19 pandemic. Ang uban man gud nato, mora ba’g naa magpunay lang ta’g nganga, magpaabot kung kanus-a ta hungitan sa atong gobyerno, lihok ta mangita kita og paagi kung unsaon nato ni nga malampasan.
Diretsahan nga istorya, ang Covid-19, dakog kadaut nga gihatag sa atong kinabuhi, daghan nang mga tawo sa tibuok kalibutan ang nangamatay kay traydor man kini siya, usa ka kaaway nga dili nato makita.
Apan sa pikas nga bahin, ang Covid-19 adunay dakong kaayuhan nga nahimo dili lang dinhi sa ato, kon dili sa tibuok kalibutan, nawala ang polyusyon nga gibuga sa atong mga sakyanan sa kawanangan, wala na’y mga dagkong pabrika nga nag-operate, wala na’y mga aeroplano nga nagsabuwag ug ma-itom nga aso sa atong kahitas-an.
Tingali, gituyo kini sa atong Ginoo, kung Iya man kining kabubut-on aron silhigan ang atong kalibutan gikan sa tumang kahugaw mugna natong mga katawhan, kay karon hinlo na ang atong katubigan, wala na’y illegal logging ug illegal mining, apan ang pangutana, hangtud asa kutob ang paghugas sa atong Ginoo niining giingong 'hugaw ta nga kalibutan'.
Atong agwantahon kay kung ang Covid-19 adunay kadaut nga nahimo, aduna usab kini gihatud nga kaayohan sa atong kinaiyahan. Stay at home lang gayod.