COTABATO CITY -- Nakabsan sa kinabuhi ang duha ka batan-on nga nabuthan og eksplosibo alas 12:25 sa udto niadtong adlaw nga Sabado, Mayo 2, sa probinsya sa Maguindanao.
Naila ang mga napatay nga sila Nashruddin Utto, 12-anyos ug Edris Guiaman, 14-anyos, mga molupyo sa Barangay Sampao, Rajah Buayan, Maguindanao.
Sumala kang Rajah Buayan Mayor Jack Ampatuan nga samtang nangayam og langgam nga tikling ang mga biktima kilid sa suba sa Barangay Sampao nakapunit sila og granada.
Gidula-dulaan sa mga biktima ang granada og kalit lang mibusikad sa diha nga nahulog ug miigo sa bato.
Dead on the spot si Utto nga maoy naggunit sa eksplosibo samtang dead on arrival sa Maguindanao Provincial Hospital si Guiaman.
Naka-angkon og grabeng samad ang mga biktima sa nagkadaiyang parte sa ilang kalawasan nga igo sa tipaka sa granada nga maoy hinungdan sa ilang kamatayon.
Dako sab ang pagtuo ni Mayor Jack Ampatuan nga salin sa nakalabay nga kagubot sa ilang dapit ang napunitan nga granada sa mga biktima.
Sa kasamtangan ang kapulisan sa Rajah Buayan Maguindanao ang padayon nga nag-imbestiga kalabutan sa maong hitabo.