DUL-AN sa gatos ka mga taxi operators ug driver ang nagprotesta kagahapon sa buntag atubangan sa buhatan sa Land Transportation Franchising and Regulatory Board (LTFRB).
Gipangayo sa mga sakop sa Metro Cebu Taxi Operators Association (MCTOA) nga palagputon na ang director sa buhatan nga si Atty. Romulo Bernardes tungod sa padayong pagpanawat og aplikasyon alang sa prangkisa bisan pa man kon duna nay moratorium sa pagluwat og dugang prangkisa.
Si Richard Cabucos, presidente sa MCTOA nipasabot nga nilusad sila og protesta tungod kay ilang nakompirmar nga padayon gihapong nagpahigayon og hearing ang LTFRB alang sa aplikasyon sa prangkisa bisan kon sobra na sa kadaghan ang mga taxi sa Sugbo.
Ang MCTOA dunay nahuptang mga dokumento nga nagpamatuod sa padayong pag-isyo sa LTFRB og bag-ong prangkisa.
Ang mga drayber nga nagdala og mga placard nisaway sa LTRFB ug mismong kang Bernardes kay ang ilang gihimo nakapasamot sa kaminos sa kita sa mga taxi drayber. Gipasanginlan nila ang ahensiya nga nangwarta lang.
Nitumaw ang tensiyon dihang nigawas ug niatubang si Bernardes sa mga operator ug drayber ug gitubag ang ilang mga pasangil.
Matod ni Bernardes nga na-misinformed lang ang mga operator ug drayber kay ang tinuod dugay na nilang gihunong ang pagpanawat og aplikasyon.
Gidasig ni Bernardes nga ipaagi nila sa tarong nga dialogue ang paghilot sa kasungian apan gibohan hinuon kini sa mga drayber.
Atol sa protesta, niabot si Cebu City Mayor Tomas Osmena ug nipasalig nga motabang nga masolusyonan ang ilang reklamo.
“Akong gihangyo ninyong tanan inig abot sa eleksyon atong ibutang ang tarong nga tawo. Atong ibutang si Noynoy (Aquino). Makasalig gyud ko kung naa si Noynoy ako mismo mohangyo kaniya atong ilisan ang director, atong ilisan silang tanan,” nagkanayon si Osmena.
Wa na hinuon motingog pa si Bernardes ug siya niingon nga mismo siya gusto nang mobiya sa LTFRB-7.
Dihang gipangutana kon tungod ba kini sa reklamo, matod niya nga na-harass na gyud siya.
Mahitungod sa gihuptang dokumento sa MCTOA matod ni Bernardes nga mohimo siya og imbestigasyon nganong nakakuha og kopya ang mga operator nga wa siya masayod.
Gipahibawo ni Bernardes nga andam siyang makig-dialogue sa grupo apan wa kini moatubang kaniya ug inay gipaagi nila sa gusto nilang paagi. (CPL)