GIPASALAMATAN si Cebu City Mayor Edgardo Labella sa Department of Agriculture (DA) human iyang gitugotan ang mga baboy, karne ug ubang mga produkto sa baboy nga gikan sa mga lugar nga giila nga green zones kon walay kaso sa African Swine Flu (ASF).
Ang mayor nitug-an sa Superbalita Cebu nga human sa pag-epekto sa iyang Executive Order niadtong Abril 28, nga giulohan og 'An order exempting dark green zones or free zone from the ban on the entry of live hogs and pork products and byproducts into Cebu" nitawag kaniya ang kalihim sa DA.
"In fact gitawagan gyud ko personally ni DA Secretary Dar thanking the City Government kay atong gisunod ang mandato sa ilang departamento. It was based on the recommendation of the Inter-Agency Task Force and based on the mandate of the DA," padayag ni Labella.
Sa miaging adlaw, si Ramil Lim, presidente sa South Cotabato Swine Producers Association (SOCOSPA) nihangop sa desisyon ni Labella sanglit madugangan ang supply sa siyudad og dekalidad, barato, luwas ug igo nga karne alang sa gatusan ka libo ka mga konsumidor.
"We have been supplying live hogs and pork carcasses to Cebu City and the Province of Cebu for more than 30 years now," butyag ni Lim.
Ang swine producers maka-supply og labing minos walo ka refrigerated vans matag semana sa wala pa nipatuman og ban ang mayor sa pagsulod sa baboy gikan sa gawas sa Sugbo sa miaging tuig gumikan sa kaso sa ASF nga i-suplay sa mga meat shop, restaurant ug mga meat processor.
Apan dili sayon para makasulod sa siyudad sanglit ang mga biyahidor kinahanglan nga mopakita sa ilang ASF-Free certificate, meat inspection certificate, veterinary health certificate ug veterinary shipping permit.
Ang mga karne o buhing baboy nga ipasulod sa dakbayan nga wala o kuwang sa mga papelis mahimo kining sakmiton sa mga otoridad o pabalikon sa ilang lugar nga gigikanan. (PAC)