MIDAGHAN. Dako ang purohan nga di pa gyud malibkas ang enhanced community quarantine (ECQ) nga gitakda sa Mayo 15 dinhi sa dakbayan sa Sugbo tungod kay midaghan na ang mga natakboyan sa coronavirus kon Covid-19. Matud pa sa taho, nga niadtong Domingo, napun-an og 31 nga miabot na sa 910 ka tawo ang naigo sa Covid-19.
Samtang sa uban nga dapit didto sa Luzon nga giingon gamay ra ang mga nataptan sa Covid-19 ipaubos na sa general community quarantine (GCQ). Apan dunay mga lungsod ug siyudad nga ang ilang mga mayor nga mihangyo sa Inter-Agency Task Force for the Management of Emerging Infectious Diseases (IATF-EID) ibalik sila sa ECQ ang ilang dapit tungod kay nahadlok pa sila nga duna pay Covid-19.
Kagahapon unta magsugod ang mass rapid testing sa mga pinili nga barangay dinhi sa dakbayan sa Sugbo apan giiro ugma nga adlaw tungod kay duna pay mga kakuwangan sa pagpangandam alang sa giingon nga rapid testing. Apan dunay problema nga nakit-an sa mga nakahibawo tungod sa kagamay sa laboratoryo sa VSMMC.
Gani, dunay mga panahom sa mga makamao ning dagan sa pandemic nga posible nga adto pa sa buwan Septembre 2020 nga mabutang ang dakbayan sa Sugbo sa GCQ o di ba mabalik ta sa atong naandan nga lakaw sa atong kinabuhi.
Daghan na ang mireklamo sa kahataas sa kwatentinas labina kadtong mga trabahente nga naapektohan sa pagsira sa ilang gitrabahoan kay naglisud na sa ilang inadlaw nga panginahanglan. Ang atong mga negosyante, labina na kadtong mga gagmay, naapektohan og maayo tungod sa ilang utang sa banko.
Ang atong kagamhanan naghangyo kanato nga sa panahon makabalik na ta sa atong naandan nga panginabuhian o di ba sa ilang giingon nga "new normal" nga mopalit ta sa mga butang o pagkaon nga mga produkto o binuhat dinhi sa atong nasud aron pagbangon sa atong ekonomiya.
Kaniadto, pung pa ni Janet Danlag, ang manghod ni Doktora Malou, nga nurse sa New Jersey, kon hilantan ang anak ang inahan ra ang magproblema apan kining hilanat ug ubo nga dala sa Covid19 ang mga opisyales sa kagamhanan ang naglabad og ulo unsaon nga mapugngan ang pagkatag sa virus ug ingon man sa pagpangita sa tambal niini.
Karon, samtang nagpadayon pa ning ECQ diri sa dakbayan sa Sugbo ang atong matabang sa atong kagamhanan mao ang pagtoman ug subay sa mga lagda nga gipatoman sa kagamhanan ug sa Department of Health (DOH) sama sa pirmi nga pagsul-ob sa face mask, pagdistansya ug sa sige nga paghugas sa kamot sa tubig ug sabon o di ba alcohol.
Manghinaut lang sad ko nga ang atong kagamhanan nga magpadayon og hatag sa ayuda sa mga tawo o pamilya nga nagkalisud karon tungod kay walay trabaho. Ato lang gihapon nga huwaton hangtud nga moingon na ang DOH nga libre na ta sa Covid-19 usa pa ta mobalik sa atong mga naandan nga kalihokan o trabaho.
Ato usab hangyoon ang mga barangay opisyal nga ilang tarungon ang ilang trabaho nga karon sila, dili hinuon tanan, maoy napuntariya sa reklamo sa mga pamiltya nga wala makadawat sa ilang rasyon tungod, kay matud pa, gikapnan.