MAGPAABOT pa ngadto Agosto ang Philippine Basketball Association (PBA) Board of Governors una sila mopakanaug og desisyon kon unsa ang ilang buhaton sa 45th season samtang anaa ang hulga sa coronavirus disease (Covid-19).
"Maghihintay kami until August to decide whether it's still a go, or a season cancellation," matod ni Commissioner Willie Marcial sa www.pba.ph human sa duha ka mga oras nga teleconference.
Lakip sa mga gihisgutan mao ang kabahin sa mga magduduwa hilabi na katong adunay manug-expire nga kontrata.
Nagkahiusa sab ang Board nga wala'y tugtan nga bisan unsang player trade proposal hasta ang pagpapirma og kontrata sa mga free agents ning panahon sa krisis sa kahimsog.
"The only transaction allowed is re-signing players whose contracts have lapsed," pasabot ni Marcial.
Hinuon adunay opsyon ang teams sa dili dayon papirmahon og bag-ong kontrata ang ilang mga magduduwa nga ning-expire na ang kontrata samtang padayon pa ang problema sa liga nga hatod ning Covid-19.
Nahunong ang tanang mga kalihukan sa PBA gikan pa niadtong Marso gumikan sa pagkuyanap sa Covid-19.
Wala pa masayri kon kanus-a makabalik ang mga duwa sa liga gumikan kay nagdepende kini kon kanus-a ilibkas sa gobiyerno ang pagdili sa mga kalihukan nga makahakot og daghang mga tawo.