NAGLUMBAANAY karon ang pagpangita og tambal para sa gikaintapan nga sakit nga Covid-19. Niabot nag sobra 9,000 nga nagkasakit nga Pinoy samtang gatusan sab ang nangamatay.
Mas daghan ang nangamatay sa Amerika kay wala silay kurintinas didto. Daghang tawo didto nga dili gusto mosul-ob og maskara kay mora daw silag Lone Ranger o di ba kaha morag tulisan. Hasta ang Spain, France, Italy ug Iran ang may daghan sab nga natakdan sa sakit nga gikan kuno sa kwaknit.
Naay nag-ingon nga hinimo kini sa tawo nga gitawag og biological warfare o armas panggiyera nga gamit ang sakit nga lisod ayuhon sama sa Covid-19 karon nga wa pay tambal nga nakita. Busa niadtong niaging bulan gitas-an ni Presidente Rody ang premyo sa unang makadiskubre ug makahimo og bakuna batok sa maong sakit gikan sa P10 milyon ngadto sa P50 milyon aron mamilyonaryo gayod ang makakaplag sa tambal.
Karon ang Department of Science and Technology (DOST) may tulo na ka tambal nga gihimo aron daw mahimong bakuna. Mao sab ang Philippine General Hospital (PGH) ug University of the Philippines (UP) may kaugalingong tambal nga gidiskubre kay basin pa'g sila ang mamilyonaryo.
Karong bag-o lang, nangalipay ang mga mag-uuma sa lubi kay usa sa gipa-estudyohan mao ang gibantog nga Virgin Coconut Oil (VCO). Mantika kini gikan sa tuno sa lubi nga kinagod nga gipasagdahan lang sa dapli hangtod nga mosaka sa ibabaw ang tin-aw nga mantika.
Daghang eksperto ang nag-ingon nga tambal kining maong mantika sa bisan unsang sakit. Gani mao kini ang sangkap nga gihimo sa mga tambalan ug manghihilot aron makaayo sa tawo. Ini'g Biyernes Santo, moadto sila sa layong lugar nga may langub ug didto maghimog ritwal apil ang pagluto og mantika gikan sa tuno sa lubi aron gamiton sa ilang pagpanghaplas sa lawas sa may sakit.
Bisan ang mga doktor natingala sa gahom sa VCO sa pagpatay sa mga virus ug magpataas sa atong immune system nga maoy atakihon sa Covid-19. Ingon nila, kaonon daw sa anti-oxidant nga sangkap sa VCO ang virus mao nga di na kini modaghan pa. Mao usab kini ang gipalambo sa Philippine Coconut Authority (PCA) nga produkto gikan sa lubi nga may dakong potensyal sa langyaw'ng merkado.
Gitawag nga "tree of life" ang lubi tungod kay walay parte sa maong tanom nga walay gamit. Gikan sa butay hangtod sa iyang lawas anaa gayo'y gamit. Ang tubig niini gi-export na kay gigamit nga energy drink tungod sa sangkap niini nga electrolyte nga maayo sa lawas. Ang tuba sab gigamit aron himuong mahalong bino ug suka.
Ang bagul gipalit aron himuong activated carbon ug ang bukong gihimong produktong pangprotekta sa pagdahili sa yuta og sa industriya. Kung tinuod nga makatambal ang VCO para makahimo'g bakuna o tambal alang sa Covid-19, na hastang dakoa kining kadaugan sa mga mag-uuma sa lubi.
Kung masuta sab nga tambal diay ang sige'g kaon nato sa butong ug paghigop sa sabaw seguradong mokusog ang pag-eksport nato sa atong produkto sa tibuok kalibutan. Busa protektahan nato ang lubi kay tipik kini sa atong kinabuhi.