GIKUMPIRMAR ni Dr. Bernard Rocha, medical specialist II sa Northern Mindanao Medical Center (NMMC), nga sulod sa 48 oras o adlaw’ng Sabado ug Dominggo adunay upat ang natalang namatay sulod sa tambalanan.
Kini sila ang nakuhaan na og swab sample nga gipadala na Lunes, Mayo 4, sa Southern Philippines Medical Center (SMPC) sa Davao City.
Ang unang nakabsan sa kinabuhi mao kining usa ka 31-anyos nga babae nga gikan sa surgical intensive care unit ug gibalhin sa Emerging and Re-emerging Infectious Diseases (ERID) ward/floor nga adunay problema sa pagpanganak ug adunay existing nga congenital heart disease.
Ikaduhang nakabsan sa kinabuhi kining 68 anyos nga lalaki nga gi-admit tungod sa community acquired pneumonia ug diabetes.
Ang laing duha nga natalang namatay mao kining upat ka bulan nga kinsa kritikal ang kahimtang samtang anaa sa surgical ICU.
Gibalhin kini sa ERID ward aron sa istriktong pagmonitor ug pag-isolate human nga lakip sab kini sa na-expose sa nagpositibo nga 21 anyos nga taga Barangay Lumbia ning siyudad sa Cagayan de Oro.
Ug ang ikaupat ang 25 anyos nga babae nga gikan giraspahan human nagdugo-dugo samtang anaa sa tulo ka bulan nga pagmabdos. Nakabsan kini sa iyang kinabuhi.
Giklaro usab ni Rocha nga naraspahan na kini ug adunay mga kumplikasyon nga maoy hinungdan sa kamatayon.
Gibutyag niini nga kini tanan sila nga pasyente nga naadmit ang gikuhaan na og swab sample ang gi-forward na ang ilang testing didto sa Davao City.
Samtang sa pagkakaron adunay duha nga nagpabilin nga giadmit nga lakip sa gikuhaan og swab sample ug gipaabot ang resulta.
Mao kining 64 anyos nga lalaki nga adunay acquired pneumonia, dunay sakit sa kasing kasing ug chronic kidney disease ug usa ka 88 anyos nga lalaki adunay community acquired pneumonia ug giatake sab kini sa kasing-kasing.
Sa pagkakaron, ang NMMC adunay 17 ka mga admisyon kon diin duha niini ang positibo sa Covid 19; 14 niini ang suspects ug 1 ang negative.