DAKPAN ang usa ka uyoan human giakusahan nga nilugos sa iyang duha ka mga menor de edad nga pag-umangkon diha sa Barangay Puerto, Cagayan de Oro City.
Sa imbestigasyon sa Police Station 6 (PS6) sa Puerto sa pagpanguna ni Police Captain Ron Baba, nasuta nga ang mga biktima nag-edad og 9 ngadto 10 anyos kinsa giingong gibalikbalikan og lugos sa uyoan sa managlahing sitwasyon.
Nasayran nga usa sa biktima ang bag-o lang gilugos niadtong Sabado, Mayo 2 mga alas 2:40 sa hapon ug mireport dayon kini sa kapulisan.
Miresulta gilusad dayon ang operasyon ngadto sa suspetsado nga malampuson nga nasikop sa kapulisan, gitumbok sa mga biktima nga ilang uyoan maoy kanunay nga nga galugos kanila.
Nagtingkagol na sa prisuhan ang suspetsado karon panahona ug gitakdang mag-atubang og kasong pagpanglugos.