MGA santos nga misa lakip ang uban pa nga mga relihiyosong panagtapok ang wala gitugotan usa sa lugar nga ubos sa general community quarantine (GCQ) ning nagpadayon ang pagbatok sa coronavirus disease o Covid-19.
Mao kini ang gianunsyo ning bag-o ni Presidential Spokesperson Harry Roque.
Kini desisyon sa the Inter-Agency Task Force for the Management of Emerging Infectious Diseases (IATFM-EID).
Si Cagayan de Oro City Mayor Oscar Moreno atol sa daily press briefing Lunes, Mayo 4, niingon nga nasabtan niya ang katawhan nga buot mosimba aron adunay masandigan apan klaro ubos sa GCQ nga gidili usa ang mga santos nga misa ug relihiyosong panagtapok.
“Looking at the signs sa mga religous gatherings, you recall that I said to those believing the power of prayer. Nakasabot ako nga ang tao mangita man gyud ug kanang naay masandigan so dili ingon nga against ako sa mga religous gathering,” matud ni Moreno.
Samtang ubos sa executive order 8-A ni Misamis Oriental Governor Bambi Emano gidili usa gihapon ang ang mga santos nga misa ug uban pang mga relihiyosong panagtapok sa tibouk lalawigan aron malikayan ang transmisyon.
Pabiling ubos karon sa GCQ ang Misamis Oriental hangtod Mayo 15, 2020.
Ang Simbahang Katoliko padayon sa pag-aghat sa mga romanong katoliko nga mouban sa santos nga misa nga live diha sa Facebook page ug live sab nga mabati sa sibyaan sa radyo.