MAHIMO nang mag-abli ubos sa GCQ (general community quarantine) ang mga sinehan ug ang mga production film.
Mahimo na sad mopadayon sa ilang naandang regular programming ang mga telebisyon sama sa “Ang Probinsyano” sa ABS-CBN ug “Descendants of the Sun” sa GMA kay mahimo na man silang makabalik og taping ubos sa GCQ.
Apan ang pangutana kon angayan na ba ta ipaubos sa GCQ nga puwerte na man hinuon daghanang nag-positibo sa Covid.
Ang target date sa Sugbo nga mag-GCQ karong Mayo 21 depende kuno sa resulta sa mass testing.
Alang nako dili gyud maayong magdalidali. Sakto tong gisulti sa bilyonaryong Insik nga si Jackma nga walay kuwenta ang mga ambisyon ug damgo karong panahona. Ang importante karon nga buhi ta. “If you can stay alive then you would have made a profit already.”
MUSIKERO
Sa showbiz ang pinaka-apektado kining mga gagmayng artista ug talent nga nagsalig lang intawon sa mga raket.
Kon magdugay pa kuno ni basin wa na silay kan-on ug ikasuporta sa ilang pamilya.
Bisan dinhi sa Sugbo mao say yangongo sa mga musikero nga nagsalig lang sa mga booking. Ang nakaparat kay wala sila maapil sa social amelioration program.
Unsa kahay plano sa atong lokal nga kagamhanan ani nila?
MANANUM NA LANG
Naa koy suggestion kana bitaw mga madakpan nga nakalapas sa quarantine, hain man kahay maayo imbes pasayawon, patamnon na sila ug palimpiyuhon sa mga kanal mas makatabang pa.
Mananum na lang ta kay sigurado pang duna ta’y maani kaysa magsige ta og salig sa gobyerno nga utro man sad na silang dunay mga panginahanglan labi na nga hapit na sad ang eleksyon. Kuha mo!?
SHOWBIZ PA MORE
Nalingaw ko sa nag-viral nga litrato ni John Lloyd Cruz nga maorag nag-man sa traffic. Apan nibisita diay sa usa ka barangay kay nangutana kon unsay iyang ikatabang.
Sa una magsige’g likay-likay sa media. Karon siya na mismo ang moduol aron makakuhag atensyon sa media.
Maora sag si Ellen Adarna nga sige lag paukyab sa social media.
Unsa man nag-contest ni sila og padaghanay og views ug likes? Haha...
Pagka-showbiz!