NALUOY ko nga nagtan-aw sa kahimtang sa Estados Unidos tungod sa ka grabe sa kataas sa kaso sa Covid-19.
Sila ang nag-una sa mga nasud nga daghang nangamatay nga moabot og 69,921, Lunes, Mayo 5.
Nakita sa mga bati sa US nga sa Hunyo ning tuiga moabot ngadto sa kapin sa 100,000 ang mamatay sa Covid-19. Ang Amerika adunay 1,212,900 ka mga kaso.
Ug ang total sa positibo sa Covid-19 sa tibuok kalibotan moabot na og 3,646,225 ug adunay 252,408 ang kinatibuk-an sa mga namatay.
Gidepensahan sa World Health Organization (WHO) nga ang killer virus milukso gikan sa mananap ngadto sa tawo.
Kini nasukwahi sa pasangil ni Presidente Donald Trump sa Amerika, gikan sa Wuhan Laboratory sa China ang Covid-19.
MASS TESTING
Dili lang kita mabalaka kon kalit ang gidaghanon sa pagsaka sa Covid-19 sa mga dakbayan sa Sugbo, Mandaue ug Lapulapu.
Gumikan kay karon, Mayo 6, ang pagsugod sa pagpahigayon sa mass ug rapid testing sa mga barangay.
Sa kalit unyang pagsaka sa kaso samtang nagkaduol na ang paglibkas sa enhanced community quarantine (ECQ) karong Mayo 15, lugwayan o dili na?
Gigutom na ang katawhan samtang nagpabot ang daghang bayranan. Apan atong unahon ang kasiguroan sa atong panglawas.
BOLJOON
Samtang nalingaw ko sa paghimo og istorya sa mga nagkadaiyang balita sa lungsod sa Boljoon, probinsya sa Sugbo.
Nagsugod man gud kini sa mga reklamo nga akong nadawat kabahin sa kahusay ug kalinaw ug mga programa nga gipaagi sa social media.
Miabot sa punto nga nakigkita kanako sa personal sa siyudad sa Sugbo, ang mipadangat sa ilang reklamo.
Pila may estorya, nagkita mi sa usa ka restaurant bitbit ang record sa pulis sa pagdakop sa usa ka sakop sa ilang pamilya nga nakuhaan ug drugas.
Laing reklamo kabahin sa pagpalit og NFA rice sa municipal government para sa mga naapektahan sa Covid-19.
Unsang pagka buntanga isip tulubagon namong sakop sa media ang pagkuha sa habig o side ni Mayor Merou Derama ila man nga gikasuko ug ako naman ang ilang giaway.