Editoryal: Senate Resolution No. 370

DAGHAN karon ang mipagula sa ilang mga mulo, labi na kining anaa sa lisud kaayo nga estado sa panginabuhi, nga kung sa laktud, matawag nga mga “poorest of the poor”, kay giingong sila unta’y matabangan sa gobyerno, apan ang kadaghanan kanila, wala maapil sa Social Amelioration Program (SAP) sa Department of Social Welfare and Development (DSWD) luyo sa krisis nga dala sa coronavirus disease (Covid-19).

Labi na ang mga senior citizens, mga lolo ug lola nga wala gipang-apil sa SAP, kay lagi ang DSWD nangatarungan nga naa sa regulasyon nga kung gadawat naka og pension ug bisan unsa nga benepisyo gikan sa panudlanan sa gobyerno, dili na maapil sa SAP.

Mulo sa mga katiguwangan nga kung naa man sila’y nadawat nga pensyon, kulangon kaayo sa pamalit og tambal ug sa panginahanglanon sa pamilya nga miatiman kanila. Samot nga nagpait gumikan sa nagpadayong enhanced community quarantine (ECQ), kay di naman makapangita og panguwarta ang mas batan-on nga miyembro sa pamilya.

Tungod niini si Senador Risa Hontiveros miduso ug mitanyag og resolusyon sa senado nga mao ang Senate Resolution No. 370 sa pag-awhag sa DSWD nga palapdan ang programa sa SAP ug iapil ang mga pamilya nga dunay mga senior citizens.

“An overwhelming majority of our senior citizens are poor. The SAP should ensure that they are able to purchase their basic necessities and prescribed medicine, or support families in these conditions,” sulti ni Senador Hontiveros human sa lugway sa ECQ sa Metro Manila ug sa ubang lugar nga anaa sa high-risk areas diin suma pa, hatagan og prayoridad ang mga katiguwangan.

Dili ikalimod nga daghan karon nga pamilya ang wala naapil sa SAP, apan depensa sa DSWD ang barangay niini ang nag-validate kung kinsay angayan nga makadawat sa ayuda sa gobyerno nga tag P5,000 ngadto P8,000 nga cash assistance.

Bisan og giingon sa barangay nga lihetimo gayod ang mga nakadawat subay sa regulasyon sa DSWD, apan dili malikayan nga naa pa gyod unta’y mas nanginahanglan nga modawat sa ayuda sa gobyerno, labi na kining mga pamilya nga dunay mga edaran.

Pinaagi sa Senate Resolution No. 370, unta dili magduha-duha sa pagtando ang DSWD ug bisan ang Presidente Rodrigo Duterte sa pag-aproba niini gumikan dako kining tabang sa ubang pamilya nga dunay mga edaran nga wa maapil sa SAP.

Angay hinumdoman sa gobyerno nga sa kaso sa Covid-19 sa nasud, 68 porsiyento sa mga nangamatay, mga katiguwangan, busa ayudahan sila pinaagi sa pag-rebyu sa mga angay maapil sa SAP aron unya mabati sa mga edaran ang paghigugma sa gobyerno diha sa ilang naghinapos nga mga adlaw sa kalibutan.