BAYNTE ka mga tag-as nga matang sa armas o high-powered firearms (HPFA) ang narekober gikan sa mga gerilya sa Front North, usa ka yunit sa New People’s Army (NPA) nga giukoy sa mga utlanan sa Agusan del Sur, Surigao del Sur, Davao De Oro, ug Davao Oriental, ngadto sa Joint Task Force Agila sa Eastern Mindanao Command niadtong Dominggo, Mayo 3, 2020.
Alas 10 sa buntag, mga elemento sa 66th Infantry Battalion (IB) ubos ni Lieutenant Colonel Roman Mabborang, niakisyon sa impormasyon sa kanhi rebelde kinsa nisurender sayo niini ngadto sa Provincial Task Force ELCAC Davao De Oro, dinungan nga nakadiskobre sa duha ka hugna sa mga armas nga niabot og siyam ka HPFA.
Ang unang hugna nahitabo sa Sitio Matigdaw, Barangay Marayag, Lupon, Davao De Oro nga gilangkuban sa (1) M60 Machine Gun, (3) M16 rifles, ug (1) M14 rifle. Ikaduhang hugna mao ang nadiskobrehan sa Sitio Casunugan, Barangay Mahan-ub, Baganga, Davao Oriental nga gilangkuban sa (3) M16 rifles ug (1) US M2 Carbine rifle.
Sa pagkahapon, usa ka kanhi rebelde kinsa nisurender ngadto kang Lieutenant Colonel Louie Dema-ala sa 67th Infantry Battalion niadtong Mayo 2, 2020, nangulo sa tropa sa hiniusang yunit ubos sa 701st Infantry Brigade sa pagdiskobre sa lain na sab nga ihap sa mga armas sa samang grupo sa NPA didto sa Sto. Spur 3, Barangay Aliwagwag, Cateel, Davao Oriental. Ang tropa nakarekober og (5) M16 rifles, (2) AK47 rifles, (1) M4 rifle, (1) M203 Grenade Launcher, (1) M14 rifle, ug (1) M653 rifle.
Sa taho nga gihimo ni Brigadier General Eriel Niembra, Commander sa 701st Infantry Brigade ngadto kang Major General Reuben Basiao, Commander sa Joint Task Force Agila, ang NPA North Front nahugno na human pagsurender sa ilang mga regular nga sakop atol sa niaging mga bulan isip resulta sa way puas ug panaghiusa nga paningkamot sa mga tropa sa gobyerno ug mga lokal nga kagamhanan.
Una niini nga taho niadtong Mayo 2, 2020, nakasakmit sab ang 67th IB og (4) AK47 rifles, (1) M14 rifle, (1) Garrand rifle, ug (1) M79 Grenade Launcher didto sa So. Alimot, Barangay Salvacion, Trento, Agusan del Sur human gibutyag sa laing rebelde nga nisurender.
Tungod niini, gidayeg ni Major General Jose C. Faustino Jr., Commander sa Eastern Mindanao Command ang kalampusan sa mga yunit ug nagtumbok sa hiniusang paningkamot sa Task Force on Ending Local Communist Armed Conflict (TF-ELCAC) nga dako nga tabang sa among operasyon. (PR)