GITUBAG ni Cagayan de Oro City Mayor Oscar Moreno ang petisyon sa 26 ka mga barangay kapitan nga naghangyo nga ipaubos na sa enhanced community quarantine ang siyudad sa Cagayan de Oro nga usa sa paagi nga pakigbatokan ang pagkatap sa coronavirus disease (Covid-19).
Lima ka pahina ang tubag ni Moreno ngadto sa kapitan sa Barangay Kauswagan, Nazareth, Macasandig, Puerto, Lapasan, Macabalan, Bayabas, Bonbon, Balulang, Consolacion, Bulua, San Simon, 1, 15, 5, 16, 26, 31, 36, 33, 2, 12, 23, 30, 38, ug 34 nga maoy nipirma sa petisyon samtang duna sab pipila ka mga residente gikan sa barangay 17, Patag ug Puntod ang mipirma sa petition.
Gipasabot ni Moreno nga dili niya makonsidera ang petisyon nga ipaubos sa ECQ karong panahona hilabina nga ang siyudad lakip sa gideklarar sa Inter-Agency Task Force for the Management of Emerging Infectious Diseases (IATFM-EID) nga anaa sa moderate risk sa Covid-19 ug kini ubos sa General Community Quarantine lamang nga daw nagpasabot lamang nga girekognisar ang paningkamot sa siyudad.
Ang mga guidelines niini iyang gipasabot nga maoy matuman.
Gipasabot sab niini nga dili siya ang makabout nga magpatuman sa ECQ tungod kay ang (IATFM-EID) lamang dunay kapasidad niini.
Gitubag sab niini ang kalabot sa disbursement sa calamity fund nga iyang gilatid nga nadisbursed na ang 30 porsyento niini ug sa kinatibuk-an moabot na ngadto sa P159 million ang nagasto sama sa food aid.
Gipasabot sab niini nga ang 500 million ang wala pa nadisbursed ug gibilin kini kung ugaling moabot sa punto nga ipaubos sa enhanced community quarantine ang siyudad.
"Prudence dictates that unless absolutely necessary, we hold on and save whatever resources we have," matud ni Moreno.