NAGPAGAWAS og advisory si Dr. Jerie Calingasan, ang chairman sa Misamis Oriental Provincial Task Force for Covid-19, penetsahan Mayo 5, 2020 nga gidili subli ang bisan-kinsa nga moangkas sa motorsiklo.
Gipasabot ni Atty. Jeffrey Saclot, ang spokesperson sa Provincial Task Force, nga ilang gisubay lamang ang kamandoan sa national labina ni Presidente Rodrigo Duterte nga nakalatid sa Executive Order 112 ug sa Department of Transportation mahitungod sa Transport Guidelines.
Lakip sa gidili mao kining pagkaon sulod sa restaurant o bisan usna nga mga kan-anan apan mahimo lang ang take out ug delivery.
Limitado usab sa lima lamang ka tao ang kinahanglan nga mosakay sa cargo truck o mga delivery truck bisan pa og anaa o wala kini sulod.
Ang angkas sa motorsiklo ang pabilin nga gidili bisan pa kini sakop sa pamilya aron maobserbar ang social distancing.
Gimandoan ni Calingasan ang mga mayor sa 24 ka lungsod ug 2 ka siyudad sa lalawigan nga tumanon kini nga bag-ong kamandoan.
Nangayo og pagsabot si Atty. Saclot hilabina nga naanunsyo ug gitogotan na ni Governor Bambi Emano ang angkas sa motorsiklo atol sa deklarasyon niini sa ekstensyon sa general community quarantine sa lalawigan apan giingong gisunod lang usab niini ang mandato ni presidente Duterte.