ORMOC City, Leyte - Mayor Richard Gomez nipaubos sa enhanced community quarantine (ECQ) sa Purok 10 sa Barangay Linao ning dakbayan human usa ka residente nagpositibo sa coronavirus disease (Covid-19) rapid antibody test.
Matod ni Elsie Jaca sa City Health Department, di pa hinuon kompirmado nga naay Covid-19 ang pasyente. Kuhaan nila ni Jaca og swab samples ang pasyente ug ipadala sa Vicente Sotto Memorial Medical Center (VSMMC) sa Cebu City.
Sa VSMMC ipahigayon ang confirmatory test sa swab samples aron mahibaw-an kon positibo o negatibo siya sa Covid-19.
Samtang nagpaabot sa resulta, si Gomez niisyu og Executive Order Number 51 pag deklarar og ECQ sa lugar diin nagpuyo ang pasyente.
Matod ni Gomez nga ko ugaling naay Covid-19 ang pasyente, mapugngan ang pagkatap niini sa laing lugar pinaagi sa ECQ.
Way makasud ug makagawas sa Purok 10 gawas lang niadtong mga nagtrabaho sa hospital ug ubang medical facilities; mga nagtrabaho sa botika ug funeral establishment; mga pulis, militar, coast guard ug bombero lakip na ang mga kawani sa gobyerno nga dunay opisyal nga buhaton.
Ang barangay officials sa maong lugar nga gi-lockdown pwede ra makagawas sa ilang balay pero dili pwede kagawas gikan sa lugar. Matod ni Barnsby Cagang sa Traffic Enforcement and Management, naa silay mga sakop sa mga border nga pwede masugo sa mga residente.
Duna lang hinuoy mga oras nga gitagana sa pagpamalit sa mga panginahanglanon sa mga residente sama sa Boroc ug Purok 7 sa San Pablo.
Base sa kamanduan ni Gomez, tanan nga namuyo sa Purok 10, gikonsidera nga Persons Under Monitoring (PUM) sa posibilidad nga nakaduol kini sa pasyente.
Ipaubos usab sa rapid test ang pamilya sa pasyente nga maoy dunay close contact kaniya.
Dugang ni Jaca nga naa na karon sa Covid-19 Facility ang pasyente ug gi-isolate samtang padayon nga giobserbaran ang kondisyon niini.
Ang Ormoc City dunay naitala nga positibo sa rapid test gikan sa laing lungsod.
Gipasabot ni Jaca nga nakasud diri sa dakbayan ang maong mga pasyente kay pag abot sa border, mga emergency surgical cases ang hinungdan.
Apan sa ilang pagka admit, nigawas ang pipila ka sintomas sa Covid-19 hinungdan nga ilang gi-rapid test ug nag positibo.
Giklaro ni Jaca nga naa sa maayong kondisyon ang mga pasyente ug gipaabot nalang ang mga resulta sa confimatory test. (JKDP)