SA pagkakanselar sa 10th Asean Para-Games nga ipahigayon unta sa Pilipinas, ang Sugboanong si Arnold Balais adunay tambag sa sama niyang para-athletes.
Sa interbyu sa SunStar Cebu, igsuon buhaton ning mantalaan, asoy ni Balais nga kinahanglang kanunay maglantaw sa positibo nga aspeto sa kinabuhi taliwala ning panahon sa krisis sa kahimsog.
Ning bag-uhay lang, gianunsyo sa Philippine Sports Commission (PSC) ug Philippine Paralympic Committee (PPC) nga hingpit na nilang gikanselar ang pag-host sa nasod sa Asean Para-Games human sa pipila ka mga higayon nga pagkauswag niini gumikan sa hulga sa coronavirus disease 2019 (Covid-19).
Kini nga desisyon nahisubay sa kamanduan sa PSC nga dili na mopahigayon og sporting events hangtod nga aduna na'y vaccine alang sa Covid-19.
Ang Asean Para-Games usa ka kompetisyon na ipahigayon matag duha ka mga tuig alang sa differently able athletes sa Southeast Asian.
“We just have to stay positive and just look at the bright side of this crisis,” matod ni Balais, kinsa maoy nigiya sa Philippine Accessible Disability Services Inc. (Pads) Dragon Boat Team sa 14th IDBF World Dragonboat Racing Championship sa miaging tuig sa Thailand diin mikulit ang grupo isip labing unang world Para-Dragon boat champion.
Giangkon ni Balais nga sakit alang kaniya ang pagkanselar sa 10th Asean Para-Games apan nakasabot siya nga alang kini sa kaluwasan sa mga nahilambigit.
“You feel sad but when you look at the situation now, canceling the hosting is the right move because the safety of everyone is the primary priority in this Covid-19 crisis,” dugang ni Balais.
Gipasabot ni Balais nga wa man sab mausik ang ilang paningkamot sa training gumikan kay nakapalambo kini sa ilang abilidad. Asoy niya nga daghan pang kompetisyon nga ilang masalmutan sa higayon nga mobalik na sa normal ang sitwasyon. (RSC, ESL)